黎姿去年與富商馬廷強結婚，今年7月終一償心願為丈夫誕下孖女，她為了有充足奶水餵孖B而決定放棄收身大計。前日黎姿偕老公到中環開餐，雖然她面部仍脹卜卜，但全程笑到四萬咁口，幸福滿瀉。
現年39歲的黎姿今年7月為53歲富商老公馬廷強誕下孖女，由於細孖出世時只重3磅多，黎姿出院當日只能帶大孖出院，細孖則仍要瞓氧氣箱。直至上月底，體重升至5磅多的細孖終可回家跟父母團圓。由於黎姿連月來要照顧大細孖，以及為了有充足奶水餵孖B，以致未有時間收身喼弗。
前日下午，已坐完月多時的黎姿與馬廷強偕友人到中環四季酒店午膳，一行五、六人逗留至下午3時40分離開。榮升幸福媽咪的黎姿，挽住Hermès birkin手袋與老公及友人步出酒店門口，雖然前日天氣頗熱，但明顯還未收身的黎姿，仍穿上大大件乾濕褸款外套遮掩身材。
黎姿步出酒店後，站在一旁跟友人滔滔不絕，其間她將手上拿着的Moet&Chandon香檳送給其中一位女友人，但女友人不好意思婉拒，黎姿於是找老公幫口，結果前後擾攘了幾分鐘，女友人始肯將香檳收下。笑容滿面的黎姿跟友人道別後，便與老公乘寶馬房車離開。
據悉，黎姿未有為孖女擺滿月酒，改於下月底在中環四季酒店為孖女擺百日宴，未知前日黎姿到四季午膳，是否順道為孖女百日宴揀選菜式或是試菜。
from:
http://hk.apple.nextmedia ... art_id=14495864
