現年32歲的林嘉欣未婚懷孕，惹來坊間傳言滿天飛，有消息指她戀上已婚的廣告導演袁劍偉，但男方離婚後卻與嘉欣分手收場。記者昨日聯絡上袁劍偉，他承認6月時已與嘉欣在溫哥華舉行婚禮，袁劍偉說：「其實我同嘉欣係喺拍Regene廣告時認識，我同前妻喺06年分居，08年搞掂晒啲手續之後先至同嘉欣一齊。」問喜歡嘉欣甚麼優點時，他說：「大家對文化方面有共同興趣。」訪問期間，袁劍偉顯得較害羞，不大擅詞令，問他BB性別時，他表示還未知道：「我哋選擇唔知住，等BB出世有個驚喜。」至於嘉欣是否懷孕6個月，以及選擇順產還是開刀，袁劍偉表示保留私隱。
身為嘉欣契媽兼好友的前輩歌手潘迪華，不忍見契女無辜受屈，昨日終挺身為嘉欣講說話，力指嘉欣是在袁劍偉與太太分開後才開始交往，二人兩情相悅真心相愛，在今年6月13日，懷有多個月身孕的嘉欣已與袁先生在加拿大溫哥華舉行婚禮，攜手邁向人生另一歷程。
潘姐姐昨日在電話中說：「嘉欣係我契女，本來我唔想講咁多，始終係佢同Steve（袁劍偉）嘅事，但我睇到好多人攻擊佢，令到我個心好唔舒服，要企出嚟講句公道說話。嘉欣同Steve已經喺6月13日喺溫哥華舉行婚禮，我都有出席，圈中人就得我一個，雖然長途跋涉，但既然係嘉欣人生大事，梗係要去啦。Steve嘅爸爸媽媽一早唔喺度，但佢姐姐、哥哥同阿嫂，嘉欣嘅父母、姊妹、朋友同埋同學都有出席，又有牧師喺度主持婚禮，嘉欣當日着住白色婚紗，雖然好小型，但好溫馨、好莊重，大家都好感動。」
潘姐姐續說：「其實Steve同太太5年前已經分居，早年幾兩年前已經辦妥離婚手續，嘉欣係喺Steve同太太分居之後，佢哋兩個先至一齊，唔係外邊啲人傳話因為嘉欣而離婚。嘉欣同Steve係有咗之後先至結婚，佢哋兩個都係負責任嘅人，既然佢哋真心相愛，又有咗BB，點解唔結婚啫？結婚生兒育女呢啲係好正常不過嘅事。其實嘉欣好喜歡演戲，諗住生完BB之後再出嚟拍戲，但袁生就唔想佢再出嚟，呢啲嘢等嘉欣佢自己再決定啦，但家啲是非傳到咁樣，嚇怕咗嘉欣唔敢再返出嚟都唔定，希望大家錫住佢哋，唔好再亂咁寫啦。」問嘉欣是否懷孕7個月時，她笑說：「6個月左右啦，嘉欣係有咗2、3個月結婚嘅！」問對這位契女婿印象如何時，潘姐姐說：「佢好尊重長輩、好有禮貌，呢啲咁好嘅男人家好少見o架啦，我畀佢90分。」
林嘉欣的丈夫袁劍偉，已年過四十，在加拿大修讀心理學，回港加入無綫任職MV編導，曾執導包括周慧敏、王馨平、湯寶如、彭羚和張學友MV，其後轉戰廣告界任導演。袁劍偉08年認識林嘉欣，隨即展開熱烈追求。
from:
http://hk.apple.nextmedia ... art_id=14438529
