原來林嘉欣係岩井俊二粉絲，睇晒岩井所有電影。
日本著名導演岩井俊二前晚喺香港出席新片《夢燑花嫁》首映，吸引咗林嘉欣、顏卓靈、邵音音等捧場。岩井十年前曾來港宣傳《花與愛麗絲》，佢讚香港人仍好有活力，又以廣東話講：「大家好，我係岩井俊二。」
岩井仲同楊崢玩自拍㖭。
顏卓靈前晚捧岩井俊二場，佢透露俾公司阻止着性感晚裝去頒獎禮。
以為觀眾係臨記
林嘉欣原來係岩井粉絲，佢話自己睇過晒所有岩井嘅電影，好多年前喺日本同岩井食過飯。嘉欣又話準備緊出席香港電影金像獎嘅衫，但唔會搵囡囡幫手揀，顏卓靈就話原本揀咗套性感晚裝，但公司話太性感，要佢清純啲。另外，楊崢同岩井合照時，岩井仲攞個手機出嚟同佢玩自拍（selfie），搞到楊崢好開心。岩井不停玩自拍之餘，仲拍繙譯同觀眾㖭。
前晚播出三小時導演剪輯版，完咗之後岩井出席咗座談會，提到除咗女主角黑木華外，性格女歌手Cocco有份演出，仲扮演AV女優，Cocco一向低調，岩井話因為係佢粉絲，又睇過佢演舞台劇，覺得好適合片中角色。有觀眾話其中一個鏡頭好似佢套名作《情書》，岩井竟然話唔記得咗係《情書》邊個鏡頭！《夢燑花嫁》中講到有啲婚宴嘅賓客其實係請臨記充撐場面，岩井問：「今晚咁多觀眾嚟，其實係咪電影公司請嘅臨記？」令全場爆笑！
撰文：馮仁昭
馮仁昭
from:
http://hk.apple.nextmedia ... 160310/19523010
