現年34歲嘅蒙嘉慧（YoYo）同42歲男友鄭伊健拍拖4年，感情一向好穩定，雖然上年有傳YoYo向伊健迫婚唔成功，加上伊健樂做王老五，同埋最近嘅事業又發展得唔錯，相信佢哋家仍甘於現狀。
唔知係咪男友唔得閒陪伴，YoYo噚日下晝5點幾就同無綫節目主持周子駒到中環連卡佛行街，佢哋原本好親熱咁孖住去睇女裝鞋，但未開始真係睇鞋時，眼利嘅YoYo已經發現記者嘅蹤影，雖然YoYo滿臉歡容向記者揮手示好，但見到記者影相又即刻火速分道揚鑣。
YoYo同周子駒道別時仲話：「我行呢邊，你行嗰邊。」最搞笑係原本等緊升降機嘅周子駒又煞有介事連都等唔切就即刻離開，似乎怕俾記者影到兩人嘅合照。
馮仁昭翻查資料發現上年5月，YoYo都試過撇甩男友同周子駒食飯，當時周子駒發現記者後都表現避忌，仲即刻喪跑離開，令人莫名其妙。
from:
http://hk.apple.nextmedia ... art_id=13953736
