李克勤下月將榮升第二任父親，困擾他多時的合約問題亦有定案，笑言自己是「瘦田」的他，未有承認或否認是否有線及英皇的挖角對象，但仍難掩沾沾自喜之色。
克勤、譚詠麟（阿倫）、孫耀威及張敬軒昨日齊出席「Uni-Power大合唱會DVD簽唱會」，四人大打親民牌，與歌迷玩遊戲外，又落台跟歌迷影大合照，氹得歌迷十分開心。
克勤大方承認下月再添男丁：「到時會剖腹，我會陪產，如方便會向傳媒發相，暫時未改名。（囝囝Ryan可知要做哥哥？）知道，暫時未見佢呷醋。」此外，克勤指唱片及電視台合約終明朗化，不過因現時和無綫尚有合約，暫不可以多說，對於有報道指有線以千萬邀加盟？他風騷說：「我變咗『瘦田』，『瘦田』冇人耕，耕開有人爭，我都有問過經理人，但佢叫我去生仔先。（有冇為一千萬心動？）諗吓都開心，如果真係嘅話。」
對於容祖兒亦拉攏他過檔英皇，克勤稱：「我同環球仲有一張國語及廣東碟合約，我同祖兒話你等得就等，講笑o者，呢個世界係圓，或可以合作開演唱會，祖兒可能睇中我個仔多啲。」
另外，阿倫前晚擔任Mr.演唱會的嘉賓，談及故友尹志強的追思會，阿倫謂定會撐場，但暫時未定日期及地點，追思會有設紀念冊，或會搞紀念足球賽，因他腳傷未愈，未必會落場踢波。
