無綫同HKRIA四大唱片公司嘅版稅爭拗搞到互相杯葛，其中環球唱片仲發動旗下歌手用廣東話同無綫以外嘅電視媒體做訪問，但無綫契仔李克勤仍堅持以普通話接受有線電視訪問，事關無綫喺克勤事業低潮期畀咗好多機會佢，佢唔要做反骨仔。
噚日克勤去咗大嶼山出席「長者千歲婚宴」活動，佢拒絕咗有線嘅廣東話訪問邀請，連單獨訪問都唔做，叫有線攝製隊拍攝佢接受報紙記者訪問嘅情況就算，睇嚟無綫同環球之間，克勤真係同無綫親啲，但佢就話：「我同TVB仲有幾個月合約，我尊重合約精神。我最唔如意時係TVB畀機會我，過往廿幾年都係，做落有感情。」
對於張敬軒嘅歌星合約冇語言限制，唔通克勤嗰份有？佢話：「總之我係舊派，保守派，份合約好厚，我唔識每個字解，但我有責任為合約機構服務。」滿約後仲簽唔簽無綫？同環球都剩返幾個月約嘅克勤話：「唔知，簽TVB合約只可以喺TVB出街，同唱片公司簽約又唔可以喺TVB出現，咁我喺邊個電視台出現呢？」搞到咁克勤都好頭痕，佢要同經理人研究完先決定喎，佢話：「我喺環球做咗咁多年冇任何不滿，唔好話我親邊度，只係身份尷尬，總之兩邊都有感情。」
同屬環球嘅張敬軒同謝安琪噚日出席商台《饑饉三十》活動，軒仔讚克勤做法係飲水思源，好值得後輩學習，但佢自己係新一代歌手，只可以跟公司做嘢。講到今年金像獎交畀亞視搞，謝安琪話電影盛事佢都會支持，冇必要太政治化。
http://hk.apple.nextmedia ... coln_id=6802139
