蒙嘉慧唔介意做二線

蒙嘉慧、陳法拉、葉翠翠和高鈞賢等昨日在將軍澳電視廣播城出席無綫新劇《誘情轉駁》的開鏡拜神儀式。蒙嘉慧和法拉的對手戲頗多，但蒙嘉慧卻被指淪落為二線。至於被指戲份少過法拉，蒙嘉慧對此說：「我少佢一集囉，係咪要咁計，要計較兩線主角，係咪要永遠霸住唔畀人上，我做新人時都有人做主角啦，我接呢套劇時都冇詢問過係咪做主角，我身為無綫人，公司安排畀我就做。」

法拉則表示第二次跟蒙嘉慧合作，由於兩人均是爽直之人，故相處得很愉快。至於葉翠翠則透露早前以爸爸的名登記，購買了Audi型號A5黑色跑車，並特意找來1186車牌，寓意日日快樂。


陳法拉、蒙嘉慧（右）和馬俊偉合作無綫新劇，卻傳出蒙嘉慧淪為二線，戲份比法拉少。

厲實記者
活動完畢，蒙嘉慧被問及遲到一事，她擘大眼死撐唔認遲到，身旁女助手更幫口解畫。當蒙嘉慧被問到被燉落二線，以及玩嘢得罪監製梅小青，她聽到梅小青的名字即時碌大眼黑面兼封口，還被助手拉到另一邊避開記者訪問。

蒙嘉慧（Yoyo）自和鄭伊健拍拖後，經常被指掛住拍拖無心工作，遲到早退兼工作態度差，得罪人多，稱呼人少。蒙嘉慧終於出事。
據知早在拍攝劇集《法證先鋒II》時，蒙嘉慧因不忿監製梅小青唔俾佢放假搵真銀而玩嘢告病假，令梅小青極度不滿。呢件事傳遍無綫製作部，間接令蒙嘉慧在最近開拍的新劇《誘情轉駁》燉落第二女主角，慘被陳法拉騎住。
上周四（13日），蒙嘉慧出席公開活動時，因遲到要周秀娜呆等，當記者問及新劇被燉做第二女主角時，她黑面死撐話：「做奸角好開心！」再問係咪因為之前拍劇玩嘢請假激嬲梅小青，蒙嘉慧更即時拂袖而去。
有關蒙嘉慧工作態度的負面消息，一直屢傳不鮮。07年6月她拍攝《與敵同行》時，被指因為顧住拍拖及講電話，加上經常遲大到又扮大牌，結果戲份被刪減。當時蒙嘉慧例牌否認，「可能因為《爸爸閉翳》啱啱出街，有劇推出就會有呢啲負面新聞，就當為劇宣傳。如果公司雪藏我，我一定會自我反省，睇吓係咪有咩做得唔好。」
事實上蒙嘉慧根本冇反省過，據知她拍完《與敵同行》後，再接拍《法證先鋒II》時因玩嘢得罪監製梅小青。據知情人士說：「個劇拍緊嘅時候，有個賺錢活動搵Yoyo去，佢向劇組請假，但套劇太趕唔可以放人，佢竟然喺活動嗰日請病假，小青姐親自打電話俾佢，話如果可以嘅話都返嚟拍少少，佢點都唔肯返，擺明玩嘢。」

周秀娜呆等
上周四（13日），與蒙嘉慧同場出席活動的周秀娜，因蒙嘉慧遲到而呆等15分鐘，但她全冇怨言，還向工作人員了解活動上推銷的新產品。

Function遲到
無綫藝員科助理藝員經理林祖輝一早到場打點，蒙嘉慧姍姍來遲，林祖輝只好尷尬地不停跟工作人員解釋，蒙嘉慧到場他才鬆一口氣。

頭耷耷走人
蒙嘉慧拂袖而去，記者尾隨不停提問，她都充耳不聞，頭耷耷快步離開。

伊健幫口︰有工開已經好開心啦！
本月3日，鄭伊健為《美女廚房》做嘉賓時，被問到女友蒙嘉慧被燉落二線，他面有難色說：「乜你哋咁o架！成日問埋呢啲嘢o架！」之後再笑笑口說：「咁有工開已經好開心，答完！」

監製唔敢用

《法證先鋒》拍攝第一輯時，已傳出監製梅小青（左）對蒙嘉慧（右）工作態度不滿，當年兩人在活動上零交流。到《法證先鋒II》時，梅小青曾公開讚劇中演員表現，唯獨沒有提及蒙嘉慧，擺到明唔妥。

之後有指蒙嘉慧拍《ID精英》時變本加厲，為了陪男友鄭伊健而經常請病假。搞到好多監製都唔敢用佢，「啲監製收晒風知道邊個演員麻煩，Yoyo嘅嘢個個監製都知，好似最近拍緊嘅《誘情轉駁》，監製徐遇安都唔敢俾咁多戲佢，燉佢做二線，仲要做十幾集就會死。」《誘》劇中她與李思捷飾演一對戀人，而男主角馬浚偉就拍住陳法拉。

遲到仲狡辯

上周四（13日），蒙嘉慧到尖沙嘴出席《CP新食品發佈會》，活動在兩點開始，同場的周秀娜未夠兩點已到場準備，但蒙嘉慧遲到約15分鐘才在助手陪同下施施然到場。記者問她為何遲到，她狡辯說：「大會通知我兩點三嚟啫。」助手加把口說：「大會叫我哋兩點半嚟。」明顯口供唔夾，但事後記者向活動公關潘小姐了解，她說：「頭先係要等埋蒙嘉慧先開始，所以活動遲咗，我哋通知佢兩點嚟，佢遲咗十幾分鐘，都唔係好多啫！」
記者問蒙嘉慧有關新劇被燉落二線一事，她同樣死口唔認，「做奸角我好開心！（係咪十幾集就死？）我會做到尾。」當記者問到是否因為得罪監製梅小青而被燉落二線時，蒙嘉慧即時黑面封口由助手拉走，唔肯再就事件回應。

新劇少戲早死
本月6日下午，蒙嘉慧與馬浚偉、陳法拉在旺角為新劇《誘情轉駁》拍外景。該劇的男女主角是馬浚偉和陳法拉，蒙嘉慧則飾演大奸角，與李思捷是一對，但她只得十幾集戲，而且會早死。

蒙嘉慧在無綫一直做第一女主角，想不到因玩嘢被燉落二線，陳法拉迎頭趕上，在劇中擔正飾演艷舞女郎，與馬浚偉是一對。

佢個角色係會死！
蒙嘉慧死撐自己會做到尾，但本周二（18日），馬浚偉在將軍澳電視城承認蒙嘉慧的角色會早死，「以我所知最初開會已經話佢（Yoyo）個角色會死，但未知幾時，雖然佢係做大奸角，但好有發揮。」

早有前科

蒙嘉慧自掛住「伊麵嫂」呢個銜頭後，負面新聞即接踵而來，當中大部分都是指她工作態度有問題。
大蝦細︰07年蒙嘉慧拍《爸爸閉翳》時，被指經常恰同劇的童星王樹熹（Jacky仔），更以指甲弄傷對方，最終要在記者會上扮friend平息事件（圖）。
遲大到︰07年中蒙嘉慧與郭晉安拍《與敵同行》，被指掛住拍拖開工經常遲大到，加上態度囂張，令工作人員非常不滿。
寸對手︰08年中蒙嘉慧再與郭晉安拍《ID精英》，有傳她不時請病假影響拍攝進度，更當眾直斥對手演技差，以及教視帝郭晉安做戲。