互聯網藏龍卧虎，不時出現奇人，早排娃娃男黃宏舜憑佢有佢唱、音樂有音樂播嘅詭異版《娃娃愛天下》，配合肢體甩骱感頑強嘅moonwalk，令到網友如癡如醉中晒娃娃毒，唔睇唔安樂。呢期網上又有新嘢睇，就係芬蘭佬唱廣東歌啦。
呢位芬蘭佬名叫Tuomas Jauhiainen，上月佢喺YouTube放咗幾段片，自彈自唱陳奕迅（Eason）嘅《沙龍》、《今天只做一件事》及古巨基嘅《愛與誠》，雖然點擊率唔及娃娃男勁，但因為佢唱得好，同埋以老外嚟講佢算咬字清晰，所以備受網友激賞。就連新藝寶早排幫Eason發《沙龍》嘅新聞稿時，都拉埋芬蘭佬嚟講，話首歌hit到連老外都要唱！
