TVB 大鑼大鼓製作，擺明抄台灣《超級星光大道》嘅《超級巨聲》，周日（6 月28 日）正式錄影，主持由最初傳出嘅吳君如變咗劉美君，爭咗幾班，講真都幾令人失望。不過，點都要俾機會人哋試吓嘅，話唔埋有意外驚喜呢。何況劉美君事前亦講明唔會對參賽者口下留情，一定會有嗰句講嗰句。可惜事實又係另一回事。
錄影當日，劉美君擺明準備未夠充份，信心亦唔夠，錄影過程佢表現得甩甩漏漏，有時仲唔知自己做緊乜咁款。最弊佢掉轉槍頭，當班評判批評參賽者時，佢竟然做晒好人，替參賽者反駁評判，搞到班評判後來都唔知講乜好！
睇嚟佢要諗清楚自己個位置係乜至得。
另一評判謝安琪賣大包，但加送膠紙一條。
當日早上至綵排完，但錄影時劉美君仍然頻頻NG ，要場務再三提佢跟住做乜。
就算補妝時，佢都要攞住劇本惡補，準備工夫未做足。
