有「可愛教主」之稱的楊丞琳，雖然在台灣拍劇冇停手，不過講到拍電影，已經要倒數到07 年與「李太」梁洛施的《刺青》，今次難得拍寰宇新片《童眼》，當然要碼實寰宇一姐江若琳。
一向人緣好世界女的楊丞琳，一開工即同江若琳混熟，相約去街不特止，擅長「升cup 」嘅32A 楊丞琳，上週更在泰國翟度翟跳蚤市場，眾目睽睽下當眾扯江若琳bra 帶，出手托咪。
據知《童眼》導演彭氏兄弟原先想搵鬼片影后李心潔做主角，點知老闆林小明死都唔肯，要搵愛將江若琳頂上，眼見江小姐咁得寵，身為第二女主角嘅楊丞琳當然識做，全程跟實寰宇一姐。
素顏雙嬌
楊丞琳、江若琳唔使開工，素顏look 去shopping ，其間江若琳經常被港人認出，要求合照。不過楊丞琳就冇人認得，咁又係，成對熊貓眼又真係幾扣分。
全程黐實
楊丞琳除咗可愛之外，亦出名人緣好，合作過嘅拍檔多數成為好友，07 年同梁洛施合作《刺青》後，即成為密友，早前有傳梁洛施在三藩市辦滿月酒，可愛教主亦成為少數圈中座上客之一。
今次新戲同江若琳飾演好姐妹，開鏡至今不足兩星期，楊丞琳已同江若琳極速混熟。戲內戲外經常跟實江若琳，上週二（2 日）二人一收工即相約到餐廳食飯，一坐低即大談「女人經」。「佢就算嗰日冇工開，都會特登去片場搵江若琳㗎！仲會等埋佢收工添！」劇組人員透露。
傳授秘方
雖然楊丞琳曾經公開寸過台灣童顏巨乳嘅瑤瑤「賣兩粒」，不過身材平板嘅佢對「谷胸」亦甚有學問。06 年出席金曲獎頒獎禮時，忽然由A 變C 級就令大家嘆為觀止。身懷絕技當然用嚟招呼新朋友，所以上週六（4 日）《童眼》唔使開工，楊丞琳同江若琳去到翟度翟shopping 期間，楊先讚江若琳皮膚白，然後再教江若琳托咪。唔只講仲出埋手，雖然有兩位男助手喺隔籬，但教主一於少理，繼續傳授秘技。其間又夾雜廣東話又國語，搞到江若琳似明非明咁；可能遲啲有機會見到江若琳升cup 之謎喎！
勁旺拍檔
楊丞琳唔單只人緣好，而且腳頭都唔錯，同佢合作過嘅拍檔都會彈起。07 年同梁洛施合作《刺青》，之後梁洛施更得到荷里活賞識，去拍《盜墓迷城3 》；台灣方面原本拍劇冇人氣嘅汪東城，因為同楊丞琳合作《愛就宅一起》而人氣反彈，而早前同潘瑋柏合作嘅《不良笑花》，亦令潘帥hit 爆，新碟大賣。
我是谷咪教主！設計對白 A cup 變C 楊丞琳托咪有一手，最成功嗰次為06 年出席金曲獎頒獎禮，身穿Miu Miu 晚裝托到盡，再身成功搶鏡。台灣《壹週刊》圖片
贅肉升cup 楊丞琳教江若琳嘅「谷咪」方法，就係將胸部和腋下之間的贅肉推回中間，即係用贅肉「升cup 」，呢個係最原始嘅人手谷咪方法。《蘋果日報》圖片
