在越南拍攝婚紗照，洪欣跟張丹峰全程投入，二人眼望眼，sweet 到暈。
今個月二十日，38 歲的洪欣，將會跟細自己十一年的內地演員張丹峰在四季酒店註冊擺酒結婚，婚禮不作大搞，不過由於收了六位數字做婚紗店代言人，二人早前飛越南拍結婚照，連踩三日，由早做到晚，換了十多套婚紗，張丹峰為要令老婆做個靚新娘，全程服侍周到，做阿四孖住搵銀。
在船上取景，張丹峰抱住洪欣喁喁細語，就連前面的攝影師都聽唔到二人對話，夠晒神秘。
跟婚紗店老闆及工作人員食飯，張丹峰坐喺洪欣旁邊，幫手夾餸斟茶，十分周到。
成日讚靚
拍拖四年，即將成為張太的洪欣，狀態持續回勇，四月著住三點式泳衣拍纖體廣告，未來老公張丹峰亦不避嫌，在現場監督洪欣影相。
孖住開工，兩夫婦再被睇中做婚紗店（Zara Bride ）代言人，婚紗禮服有贊助外，還有機會齊齊搵銀。早前，二人便飛越南埋位拍婚紗照，雖然每日要轉頭改妝換三套婚紗，不過有洪欣口中「當佢BB 咁照顧」的張丹峰在身邊，女主角全程精靈。
鏡頭前，張丹峰奉旨恩愛，私底下他對洪欣一樣周到，夾餸斟茶，見洪欣著住婚紗熱辣辣，邊影相邊攞住紙巾替對方抹汗，又不停講「好靚好靚」，甚至自己操刀影埋一份，出盡法寶為另一半叉電。
宣布婚訊後，洪欣表示拍戲著婚紗多次，驚正式行禮時冇感覺，不過跟張丹峰影婚紗照洪欣笑得十分開心，真同假始終有分別。
洪欣早前以三點式泳裝拍攝纖體廣告，未婚夫張丹峰也在現場監場，更全程相機不離手，為洪欣拍攝花絮。
蔡少芬跟洪欣認識多年，又是虔誠基督徒，好姊妹結婚當日，蔡少芬就負責整個結婚程序。
洪欣與張丹峰拍拖以來，其子莫鎬廉（左）亦非常接受，更私下叫張丹峰爹哋。
婚前大解放，洪欣在四月以三點式拍纖體廣告，身形弗到漏。
改變初衷
洪欣說，拍拖以來張丹峰幾乎相機不離身，經常為她跟莫少聰所生的兒子莫鎬廉一家三口拍生活照，今次在越南亦不例外。「佢好鍾意幫一家人影相，之後全部放晒喺電腦，我哋得閒就會睇番。」
婚禮在即，一班圈中好友蒙嘉慧、陳法蓉做姊妹，以及過來人蔡少芬負責當日結婚程序，婚前依然有job 做的洪欣，跟未來老公表現緊張。「我哋都冇乜減壓方法，淨係一味叫對方唔好緊張，就算度蜜月地點，我哋都未諗好，因為不停有變，不過我同佢嘅口味都好相似，都係鍾意陽光同海灘嘅地方，所以臨出發前決定去邊就去邊。」洪欣說。
洪欣本來打算跟兒子一齊度蜜月，不過時間難以配合，她被迫改變初衷，然而，張丹峰已籌備好於暑假跟兒子去旅行。
