由鄭少秋、周麗淇（Niki ）、滕麗名、郭政鴻同鄧健泓主演嘅無綫新劇《桌球天王》下周一晚推出，成班演員噚日齊集尖沙嘴名將桌球城宣傳，過往秋官有新劇推出都會發揮丁蟹效應，咁啱股巿大跌，秋官噚日缺席宣傳，未知係咪暫避鋒頭，搞到監製唐基明都要玩秋官，佢仲話：「秋官喺內地拍劇，嚟唔到宣傳，希望星期一唔會有丁蟹效應，我今日衣着由頭紅到尾撐住個股巿。」
郭政鴻、周家怡（左）同滕麗名齊齊為新劇宣傳。
滕麗名同郭政鴻唔介意緋聞俾人用嚟講笑，仲好合拍㖭。
秋官橫店變神醫
丁蟹效應雖然會對股巿造成影響，不過眾演員有唔同意見，鄧健泓話：「我個人希望丁蟹效應會發生，因為謠傳滙豐（滙控）會再跌，自己都想趁低買，但對於廣大巿民嚟講就可能未必係好事，郭政鴻當年（指《大時代》）都扮演丁蟹個仔，今次佢哋兩父子出場，真係要小心啲。」郭政鴻就認為效應只係咁啱啫，仲講笑話：「如果兩父子咁威力無窮就後果自負，不過我唔希望有呢個效應，想個巿升番，巿道好啲，大家開心。」Niki 就警惕大家，丁蟹效應咁勁即係明燈，既然係咁就要放晒啲股票，但都唔好太迷信。宣傳期間緋聞情侶滕麗名同郭政鴻被安排合作打桌球，再被擺上枱，監製唐基明講有味笑話，叫滕麗名揸住郭政鴻支Q （指球棍），在場啲人都忍唔住大笑，滕麗名無奈頭擰擰。《桌》劇會接《學警狙擊》時段推出，郭政鴻話：「謝天華叫Laughing 哥，我叫魚雷；佢係社團天王，我係桌球界天王。」秋官噚日缺席《桌》劇宣傳，原來佢喺橫店拍攝李亞鵬旗下製作公司及台灣民視等合資嘅新劇《神醫大道公》，劇中秋官飾演民間傳奇人物保生大帝吳本，講述佢由鄉村大夫化身神醫嘅奇妙經過。日前秋官着古裝戲服出席當地舉行嘅開鏡儀式。
《桌球天王》監製一身紅色衫，話力抗秋官嘅丁蟹效應喎！
秋官家喺橫店拍劇，唔知下星期佢套《桌球天王》播出，會唔會發揮丁蟹效應？ 互聯網圖片
鄧健泓話想趁跌市低吸滙控。
from
http://appledaily.atnext. ... art_id=12562180
