周星馳雖然係一個好有才華嘅導演同演員，但佢嘅人際關係都幾失敗，咁多年嚟成日俾舊拍檔唱衰，早前中國星老闆向華強太太陳嵐狂轟星爺工作態度有問題，仲聲明以後唔會再同佢合作。向太鬧完，日前又輪到文雋喺自己個網誌話周星馳嘅年代宣佈結束。
文雋：減弱影響力
曾經同星爺喺電影《大內密探零零發》合作過嘅文雋喺網誌話：「星爺近年已轉到荷李活發展，刻意淡出華語電影市場，同時減弱了他的影響力。」文雋喺文中又提到星爺冇人緣，因為舊柏檔吳孟達、羅家英同洪金寶都先後出嚟批評過佢，呢啲人已經唔係星爺要維繫關係嘅人啦！不過最近連導演同電影公司老闆都公開轟佢，一啲路都唔留，擺明係因為明知同佢冇可能再合作啦！
星爺同文雋（右圖）曾合作拍《大內密探零零發》，但日前文雋寸星爺年代已終結。劇照
星爺：好作品欠奉
文雋又話：「周星馳自絕於這種人際關係，當然會使自己越來越孤獨，忽然間想起陳水扁在獄中收過的一本書《窮得只剩下錢》！今天家財萬貫的星爺，的確窮得只剩下錢，星爺孤傲性格，使他頻頻碰釘。」平時好少會出聲反駁人哋批評嘅星爺，噚日好少有咁回應話：「香港影圈有部份人好嘅作品欠奉，只喜歡將精力用來批評別人，藉此提高自己，其實我覺得大家應該實事求是，做好份內事，將精神放喺電影工作上，唔係更好咩？」
想不到當年星爺同王晶、吳孟達、向華強合作無間，家三位舊拍檔都同佢疏遠。資料圖片
http://appledaily.atnext. ... art_id=12513917
