薛家燕本來拍緊無線新劇《金錢誘罪》，點知突然間冧廠入咗醫院，個劇嘅進度一定會受到影響，本來喺下個月21日要拍晒香港嘅戲份，之後拉大隊去大馬拍外景，事關個結局都係喺大馬度拍，不過而家劇組要諗計先得。
家燕姐以前都試過因拍劇扭傷入院留醫。資料圖片
（左起）袁詠儀、戚美珍同呂良偉一早知家燕姐身體有事，大家都祝佢早日康復。資料圖片
「食完嘢話痛」
其實家燕姐拍呢個劇之前身體都唔多好，仲入醫院做咗膽石手術，據悉佢手術後有啲發炎，影響到其他內臟，今次咁突然仲要休息10日，馮仁昭打畀家燕姐，佢嘅助手接聽話家燕姐兩日前係入咗醫院，不過唔係再做手術，只係要休息吓，家燕姐啲仔女喺晒外國未返嚟，佢哋有打電話問候媽咪。有份拍《金》劇嘅戚美珍噚日話：「一路知佢膽有事，我都係割咗個膽，佢成日同我研究，因為佢食完嘢話痛，佢話唔知胃痛定係乜嘢痛，咁我叫佢去睇醫生。」另外，袁詠儀都知道家燕姐入咗院，佢話：「我同家燕姐有好多戲份，佢嘅角色扮演我阿媽，希望佢早日康復，我諗唔會阻好多，大家可以跳拍，我有打過電話畀家燕姐，不過佢個助手聽，我唔再騷擾佢住，等佢休息吓先。」呂良偉就話最緊要係家燕姐休息好番先再開工，因為呢啲突發事件，冇人想嘅，佢4月又拍另一部戲，而家未知無線點安排。至於郭可盈知家燕姐一向膽有事，佢喺前日收到通知要改通告，遲啲會搵家燕姐慰問吓佢。
薛家燕最近拍緊無線新劇《金錢誘罪》，點知突然病發入醫院，要休息兩星期。資料圖片
from
http://appledaily.atnext. ... art_id=12382863
