二月十二日生日嘅李詩韻，揀正呢日做《耳分高下》嘉賓，名正言順同男友鄧健泓玩埋一齊。
李詩韻啜麵條，有鄧健泓專人服侍揸兜，黃宗澤睇唔過眼將麵條塞入鄧健泓個口，俾人整蠱，鄧健泓扮發爛，將條麵（紅圈）擲向徐子珊洩憤。
明明唔認拍拖，但李詩韻就情不自禁將自己抹過鼻嘅紙巾，幫鄧健泓抹嘴，漏晒底。
雖然李詩韻有優待，但始終輸俾又做大戲又打關斗嘅黃宗澤、徐子珊。
李詩韻獨家享用潛水鏡，黃宗澤無優惠搞到眼都擘唔大，即時投訴「大細超」。
局中有人好辦事，鄧健泓處處維護女友，主持拍檔哈林庾澄慶亦愛屋及烏。玩遊戲幫到出晒面，同場另一組嘉賓黃宗澤同徐子珊當然睇唔過眼，尤其係黃宗澤，見李詩韻可以戴潛水鏡
水入面唱歌，即刻向鄧健泓投訴：「點解佢（李詩韻）有得戴（潛水鏡）我無㗎！」詐型唔夠，仲要成晚稱呼李詩韻係鄧健泓「女朋友」，搞到呢對地下情人冇晒符。
雖然成為被玩目標，但一對地下情人亦情不自禁。當黃宗澤嗱起李詩韻食過嘅麵條塞入鄧健泓個口，兩個男人你推我撞，李詩韻情急下，竟將自己抹過口鼻嘅紙巾，幫鄧健泓抹嘴，窩心同衞生，其實都係一線之差。
