現年37歲嘅黎姿同52歲嘅富商馬廷強喺農曆新年前，喺澳洲悉尼低調舉行婚禮，之前佢哋已經公開咗一啲冧爆嘅結婚相，睇見黎姿成個闊太咁一臉幸福，馮仁昭都戥佢開心。據知佢婚後要回復低調生活，而且仲想做媽咪，專心相夫教子。
入住酒店打點
今日黎姿會派人去療養院，接佢最疼錫嘅細佬黎嬰（圖）出席喜宴。《FACE 》圖片
黎姿今晚同聽晚喺半島酒店筵開約10席，今晚宴請女家嘅親朋戚友，聽晚就宴請男家嘅親友。為咗方便唔使走嚟走去，黎姿同老公已經喺噚日上晝入住酒店，打點好一切。婚宴以酒會形式進行，仲有切蛋糕儀式。馮仁昭又收到風，今次黎姿好有心思，佢發畀朋友嘅請帖由一個紅色禮盒裝住，除咗有請帖，仲有一張餅卡同埋一封利是，佢又準備咗小禮物送番畀啲賓客。
10圍酒100萬
黎姿嫁得如意郎君，姑媽黎宣（左）亦戥佢高興。資料圖片
另外，黎姿一向好錫細佬黎嬰，由於黎嬰仍然休養緊，所以未能去澳洲觀禮，不過今次黎姿擺酒，就會接細佬出院飲呢餐，佢希望細佬睇到自己嫁得如意郎君，一齊分享喜悅。今次黎姿冇乜點請圈中藝人，只有梅艷芳生前嘅經理人王敏慧（Marianne ）、無線高層樂易玲同曾勵珍，仲有玩具大王蔡志明嘅大女蔡加敏，以及一位幕後好友。今次黎姿認真嫁得豪，佢入住半島酒店最top 嘅特級總統套房，面積超過4千呎，日租約7萬蚊，飽覽維港風景。喜宴形式先舉行酒會式派對，之後就係中式飲宴，鮑參翅肚不在話下，名酒亦價值不菲，每圍價值約10萬蚊，擺10圍都要100萬。喜宴上會播映一對新人喺澳洲舉行嘅婚禮片段。
黎姿喺農曆新年前同富商馬廷強喺澳洲註冊結婚，佢哋今晚同聽晚喺半島酒店設宴。資料圖片
http://appledaily.atnext. ... art_id=12210214
