息影冇耐嘅黎姿，近排傳佢同富商馬廷強好事近，不過一時傳佢16 號嫁，一時又話22 號包私人飛機載埋行動不便嘅胞弟黎嬰去澳洲行禮，結果呃晒。上週五（6 日）無線幫黎姿發咗四張結婚相，原來佢靜靜雞響澳洲註冊咗，而家響歐洲honey moon 緊。
無線製作資源部總監樂易玲講起黎姿嫁人十足自己嫁女咁開心：「佢（黎姿）同我通過電話，佢話做馬太好開心，雖然細佬同圈中人都冇嚟飲係有啲可惜，不過行禮時親戚同賓客嘅祝福令佢開心到喊咗出嚟，以前做藝人成日出trip ，而家做馬太就要學識點樣照顧家人、招呼朋友、煮嘢食同布置屋企，結婚後佢會繼續探細佬同返診所，黎姿仲同我講，打算生BB ，聽到真係戥佢好開心……」
樂小姐仲對新郎馬廷強讚不絕口：「我同黎姿同馬生之前食過飯，佢真係一等一好人，有情有義又可靠，係低調商人，仲好靚仔添！」
八八卦卦嘅FBI 都好想知馬太究竟幾時嫁咗，於是靈機一觸翻查呢幾張「發相」啦，發現原來有3 張相分別響上年嘅9 月1 號同9 月2 號影嘅，一個月後佢就宣布退出娛樂圈喇，呢啲咪叫事出必有因囉！
註冊1/9/08
黎姿同《東方》報業創辦人馬惜如兒子馬廷強靜靜雞響上年9 月結婚，細佬黎嬰同一向好錫黎姿嘅樂易玲都冇請。至於有傳佢哋今個月16 號會響半島酒店補擺喜酒請朋友，樂小姐就話暫時未有聽聞。不過請唔請飲都好，38 歲黎姿嫁52 歲馬廷強，兩人年齡雖差14 年，但更覺黎姿小鳥依人。
擺酒2/9/08
黎姿話以前拍戲著婚紗著到驚，所以註冊後翌晚擺酒只著晚裝。FBI 留意到新郎哥手上面嗰隻表係勞力士白金Daytona ，市值約20 萬，比佢副億萬身家，品味相當樸實。
Hermes '09 春夏單肩晚裝約8 萬
碎鑽婚戒
黎姿響婚禮戴咗鑽石耳環同一隻碎鑽結婚戒（黃圈），有錢都冇晒命。
婚書證婚
上星期五晚播映嘅《東張西望》，播咗由黎姿親述、背景係佢主唱嘅〈你是明日意義〉歌曲做襯托嘅獨白，當中有黎姿同馬廷強結婚相嘅短片，仲有黎姿婚後感想同埋佢對老公嘅感覺，真係羨慕死人。
背後女人
每張相，黎姿總企響新郎馬廷強身後，證明佢真係甘願做成功男人背後嘅小女人。梗係啦，傳佢老公送咗市值7 千萬嘅渣甸山「名門」同市值差唔多2 千萬嘅西九「凱旋門」畀佢做過門大禮，做吓小女人又有乜所謂喎？
黎姿透過娘家無線向傳媒發嘅四幅結婚相，全部只影上半身，FBI 衰諗多咗，可能係黎姿太體貼，唔想老公不良於行入鏡。《忽然1 周》圖片
幸福獨白
我很開心告訴大家，我已經結婚了，我非常感恩，終於找到一個疼惜我，可給我付託終身的人。
他有責任感，有愛心，事事包容，從他身上我學到以前從不認識的人生哲理，也感受到前所未有的溫馨，我會跟他一起，走我們未來的道路。
他除了愛我，也愛我的家人，過去光輝燦爛、五光十色的影視旅途，原來都不及現在簡簡單單的家庭生活來得充實滿足，更沒有任何東西比得上家人親情來得重要。
我已踏進人生另一階段，我會學習照顧他和我的家人，希望你們可為我送上祝福，我會掛念每一位曾與我共事的人，以往與你們一起工作的點滴，我永記於心，我也感謝TVB 和每一位喜歡我的觀眾，沒有你們的無盡支持，我不會有過去美好的日子。
在此，我祝福大家家庭幸福，新替快樂，事事如意。
