官恩娜（Ella ）日前就娛圈鹹豬手爆料，結果爆出個大頭佛，被群起轟她博宣傳。無線高層樂易玲昨表示經調查後發現Ella 將事發時間、人物和地點混淆，根本沒有Ella 所指的鹹豬手事件。Ella 昨日發聲明向被拖落水男藝員致歉。
官恩娜上周六出席港台活動時，大爆早年出埠拍劇時，有女藝員外景後往消遣期間遭一名已婚男藝員借醉上下其手，結果引起軒然大波，曾與Ella 出埠拍攝《酒店風雲》的郭政鴻和周家怡齊齊捲入是非之中。不過，盛傳是Ella 所指的女藝員「兔唇女」周家怡卻否認曾遭人抽水，慘被拖落水的郭政鴻則氣憤難平，除向Ella 保留追究權利外，更誓言與她割席。
樂易玲昨指官恩娜將事發時間、地點和人物混淆而搞出誤會。
郭政鴻（右一）與周家怡（左一）在《桌球天王》一劇合作，為表清白，他不介意跟周家怡當面對質。
「可能好心做壞事」
官恩娜昨日就日前爆料引起的風波，發聲明向一眾被拖落水藝員致歉。
至昨日事件又有新發展，自爆料後一直潛水的Ella ，透過無線製作資源部總監樂易玲發表聲明，強調事件與被傳牽涉入內的男藝員無關，並向無辜被牽涉的藝人致歉。樂易玲昨日在電視廣播城說：「Ella 主動同我講咗過陣嘅情況，佢話件事唔係發生喺佢身上，只係聽番嚟，佢話當時記者問咗好多問題，其實佢係比較模糊，有啲係佢自己答，有啲係記者幫佢，佢同我講話冇講過係《酒店風雲》，冇人同佢哭訴，佢喺無線拍劇唔多，好多女藝人個名都講唔出，我同咗好多相關藝人通過電話，希望可以重組番當時情況。了解件事後，佢（Ella ）自己都覺得將時間地點人物含糊咗，根本冇呢件事，佢哋都冇去過卡拉OK ，只係打邊爐，集體回憶事件嘅人物係冇郭政鴻，淨係得周家怡同其他人。」樂易玲續說：「佢都好擔心令同事唔開心同不便，希望同佢哋道歉，不過佢諗諗吓覺得自己講嘢唔叻，所以決定發聲明。佢唯一希望公司理解係出於好意，而唔係誣蔑任何一個同事。」問可覺有人藉故博宣傳，樂小姐說：「公司唔希望你講一句、佢講一句，咁樣係唔負責任嘅做法，Ella 可能係好心做壞事，唔係存心想做宣傳，我打過電話畀鴻仔，佢話為咗證明自己係清白，唔介意當面同周家怡、官恩娜見面，仲話可以交畀警方調查，但係我覺得事件已經明白晒，真係可以告一段落。」
郭政鴻：慎言啦
被拖落水的郭政鴻，日前和緋聞女友滕麗名轟Ella 博宣傳。 資料圖片
記者致電Ella 但未獲回覆，其經理人Keith 昨日回應說：「我哋從來冇質疑樂小姐講嘅嘢，但Ella 從來冇話過記者作料。」記者致電郭政鴻，問可接受Ella 道歉時，他說：「唉，答唔到。最緊要還我一個清白，佢一時失言令人受傷害，希望日後佢慎言啦！」此外，對無線職員涉強姦案件，無線外事部副總監曾醒明昨表示涉案助導現正休假，而另一外判員工則因合作關係受損，雙方已同意中止合作。採訪、攝影：何慧斯、楊潔雯
官恩娜日前再爆鹹豬手而引起軒然大波。 資料圖片
from
http://appledaily.atnext. ... art_id=12185001
