近日魔術鹹豬手話題成全城熱話，官恩娜（Ella ）也湊熱鬧大爆早年有男藝員借醉向女藝員抽水，結果引起軒然大波。無線對事件高度關注，昨日分別致電Ella 、郭政鴻和捲入風波的周家怡等人了解，但周家怡否認被人抽水，令事件再變成無頭公案。至於被拖落水的郭政鴻及其緋聞女友滕麗名，昨日則雙劍合璧鬧爆Ella 借勢博宣傳，郭政鴻更勞氣得要與Ella 割席。
官恩娜前日大爆出埠拍劇時，一名女藝員遭已婚男藝人借醉上下其手，令《酒店風雲》的蔡子健、吳卓羲、馬德鐘、姜大偉和06年離婚的郭政鴻等人再次被捲入鹹豬手風波。據悉Ella 所指女藝員是周家怡，無線對事件高度重視，在前日和昨日分別致電向Ella 、周家怡及有關藝員了解，但由於周家怡否認被男藝員醉後抽水，在沒有原告情況下，鹹豬手事件再次變成無頭公案。
「伸張正義咪開名咋」
郭政鴻與緋聞女友滕麗名鬧爆官恩娜借勢宣傳。資料圖片
身為郭政鴻緋聞女友的滕麗名，對緋聞男友捲入鹹豬手風波大抱不平，昨日在電話中除出言力撐外，言語間更狂寸Ella 說：「唔好玩啦，個個都講好似好熱鬧咁，不如叫番過個女仔出嚟講，唔講清楚好影響啲男藝人，想幫人伸張正義咪開名咋，咁樣估估吓令捲入事件嘅男藝人好無辜。覺得邊個有嫌疑咪出聲指證佢，件事都5年前，而家先拎出嚟講，真係死無對症。」儘管獲緋聞女友力撐，郭政鴻昨日在電話中仍餘怒未消，他說：「今日已經查出件事唔關我事，我知樂小姐（樂易玲）打咗電話問官恩娜事件男女主角係邊個，樂小姐都打咗畀周家怡了解，周家怡同佢澄清咗件事係唔關郭政鴻事。」問可覺Ella 借此博宣傳？他怒斥：「我唔知佢呢個舉動乜嘢意思，但我真係冇做過。」若日後與官恩娜合作豈非很尷尬？郭政鴻說：「唔好講呢樣住，同佢都冇朋友做。」記者昨日致電周家怡，她說：「我唔係當事人，好奇怪點解會傳出嚟。我同鴻仔幾熟吓，我相信佢唔係啲咁嘅人。」
樂易玲否認叫人封嘴
再爆男藝員借醉鹹豬手的官恩娜，昨日一整天未能聯絡得上。資料圖片
記者致電樂易玲，她說：「周家怡打電話畀我，話冇咁嘅事，如果有嘅話佢一定會講出嚟。」樂易玲又強調並非如報道所講要找Ella 照肺，而是向她了解事件經過，樂易玲說：「我噚日同今日已經打咗兩次電話畀Ella 了解，當事人否認有咁嘅事，我哋都苦無對策。我想強調我哋絕對冇叫藝員封口唔講，相反仲鼓勵佢哋有乜嘢事即刻同公司反映，因為有原告先至有被告，如果冇證冇據，會對其他無辜嘅男藝員好唔公平。」
心直口快為好友出氣
Ella 的一番言論引起軒然大波，她也自知衰多口，故已向樂易玲致歉。昨日Ella 經理人Keith 說：「其實Ella 係想幫人出氣，冇諗過要博宣傳，佢係心直口快，因為佢同個女藝員係朋友，佢原意係好，不過用錯方法，佢都知錯，佢自己都好唔開心，知道唔應該咁講，唔應該牽涉人哋。」記者曾致電Ella ，但未獲回覆。採訪、攝影：比華利、卓寶花
全城熱話：老友撐郭政鴻正人君子吳卓羲：要亂一早都亂
「我識咗郭政鴻8年，佢酒量唔錯，酒後唔會大癲大肺攬女人，絕對係正人君子，要亂嚟一早都亂咗啦，而家全部都係傳聞，都冇人企出嚟講，但講嘢啲人要負責任，咁好影響身邊其他人。」
郭可盈：個個變咗疑犯
「搞到個個男藝人都變咗嫌疑犯，聲譽攸關，我認識嘅郭政鴻係正人君子，總之當時拍劇完全冇聽過呢件事，但好奇怪咋，成5年前嘅事，而家先嗱出嚟講。」
江若琳：買防狼器傍身
「講咗出嚟對女藝人都好，有防人之心，希望搵到元凶。我就冇遇過，但都有啲驚，所以可能買防狼器傍身。」
曾在《火舞黃沙》演兔唇女的周家怡，盛傳遭男藝員借醉抽水，昨日更親自打電話向樂易玲（小圖）解畫。
http://appledaily.atnext. ... art_id=12180714
