有「翻版鄭秀文」之稱的趙頌茹（阿Yu ），○二年簽約英皇進軍樂壇，但星運平平，○五年更被公司藝人管理部總監霍汶希（Mani ）公開指摘她無故失蹤半個月，工作態度散漫，並發出「雪藏通牒」。
不似梁洛施有李澤楷擲錢同英皇玩到底，零後台的阿Yu 離開幕前，由潮流版記者到朝九晚五，最近連時裝店售貨員都做埋。不過，同舊公司關係尚有手尾，想要重新開始，阿Yu 必須得英皇特赦。
阿Yu 對潮流頗有觸覺，見她在店sell 客亦十分投入，客人問一句佢答足十句，服務態度夠晒認真。
阿Yu （右）又高又瘦，不少時裝品牌都喜歡找她行騷，但現在有騷都唔可以接，認真慘。（《蘋果日報》圖片）
養家乜都做
阿Yu 同其他英皇歌手一樣，入行都簽了一份長命約，她所簽的是十年生約，五年死約，雖然○五年與英皇分手，但附帶條件是在原有的合約期內，阿Yu 不可以做任何幕前的演出，有錢都無機會賺。
出道前曾經參加模特兒選舉的阿Yu ，由於身材夠高，又有「翻版鄭秀文」之稱，即使加入娛樂圈後，仍有不少時裝品牌搵佢行騷，收入尚算穩定，但因解約不能做幕前，收入減少，經濟出現拮据！
「本來佢屋企環境都唔錯，後來因為老豆做生意出咗問題，所以阿Yu 都要搵錢返屋企，佢做售貨員唔係偷唔係搶，無咩問題啫！」阿Yu 友人說。
鄭秀文早年舉行演唱會，特別找阿Yu 做嘉賓，更在台上笑說見到阿Yu 就如照鏡，感覺好得意。（《蘋果日報》圖片）
阿Yu 剛出道時雖然不算風頭躉，但頒獎禮亦有獎嗱。
阿Yu 離開英皇後，曾與家人到觀音廟拜神，祈求工作順利，當時她表示自己只想過簡單生活。
阿Yu 同男友周永恆一樣，在娛樂圈發展成績欠佳，周永恆現在無線擔任音樂總監，收入尚算穩定。（《蘋果日報》圖片）
英皇有共識
今個月初，本刊記者在尖沙咀發現阿Yu 在一間時裝店內幫手執貨及招呼客人，從其熟練程度，看似做了售貨員一段時間。
阿Yu 發現記者拍照後，立即閃身走到收銀枱用背脊「得」住鏡頭，之後更索性匿入貨倉，沒有再現身鋪面。
記者事後致電阿Yu ，她否認做售貨員。
「我唔係做sales ，係做marketing ，我落鋪幫公司新計劃做好準備啫。（係咪受英皇舊約所限，二○一七年前都唔可以做幕前？）我哋有共識，你哋唔好亂寫，Mani 對我好好，之前我要做視像電台佢都俾我做啦！佢哋（英皇）可以唔俾我做㗎！（會唔會好羨慕梁洛施？）唔想講人哋，總之我有嘢會自己同Mani 傾。搵食啫，你哋唔好搞我啦！」
早前阿Yu 在一個視像電台開咪做節目，本來這已算違反協議，但這次她是獲霍汶希御准的，故阿Yu 亦表示多謝對方。
至於英皇藝人管理部總監霍汶希則不在香港，其公司發言人表示，相信她回港後都會跟阿Yu 聯絡。
