風水嘅嘢正所謂寧可信其有，不可信其冇，唔好話馮仁昭迷信，做娛樂圈呢行嘅人對風水好重視，好似亞視領導人一向注重風水局，不過最近竟然俾上任12日就落台嘅王維基大破風水陣。喺亞視大堂外一直擺放咗多隻唔同形態嘅風水麒麟，但上月王維基倒台過日，傳媒喺亞視總台爭相採訪，有人打爛咗兩隻風水麒麟，結果被發現係用石膏造成，只係油上銅色。
亞視為咗緊縮開支，落選亞姐吳芳都冇得留低。資料圖片
07年亞姐季軍孫辰再過多兩星期就要執包袱返家鄉，佢話同亞視冇商冇量，喺冇選擇之下惟有接受安排。
孫辰吳芳執包袱
有員工睇唔過眼話：「唔怪得亞視人事不寧啦！」堪輿學家麥玲玲接受本報電話訪問時就話：「風水麒麟係旺地同化煞擋煞，一般風水物係用銅或者用重石造，用石膏造係咪道具嚟㗎？石膏係冇效力嘅。」另外，07年亞姐季軍孫辰及同屆落選嘅吳芳，雖然前年同亞姐簽咗一年死約一年生約，但而家亞視管理階層立立亂，加上金融風暴影響乜都縮皮，呢班外勞率先被開刀，孫辰同吳芳上月中收到通知唔再續約，呢個月中就要執包袱返家鄉武漢。孫辰噚日話：「亞視12月19日通知我話唔同我續約，過去一年都冇乜工作，我又接觸唔到公司高層，亦冇其他選擇，就算返家鄉嘅機票都要我自己畀錢買。」
亞視嘅風水麒麟上月俾人整爛咗，先發現原來唔係銅而係石膏造，麥玲玲話冇效力㗎！《壹周刊》圖片
from
http://appledaily.atnext. ... art_id=12037013
