劉家輝為盆菜宴擔任抽獎嘉賓，自己又幸運地抽中現金獎。
現年65歲的武打明星劉家輝，5年前因中風導致半身不遂，演藝工作全部暫停。雖然劉家輝至今仍要坐輪椅出入，但他熱心公益，大前日他便在中風以來首度參與公開慈善活動，為低收入家庭和長者送暖。
抽中200元獎金
大前日劉家輝在好友樊亦敏陪同下到大埔出席一個慈善盆菜宴，穿上紅藍白格仔恤衫和戴上cap帽的他，顯得非常精靈靚仔。樊亦敏前晚接受記者訪問時說：「佢好耐冇出嚟，佢自己都好想參與多啲慈善公益，由於呢排佢身體好咗，所以就同佢出席咗個盆菜宴，噚日係佢出事以嚟第一次正式參加呢類慈善活動。」
五年前中風的劉家輝，大前晚精神奕奕與樊亦敏（右一）、施祖男（左二）等參與慈善活動。
樊亦敏（右）與馬蹄露合唱《伊人當自強》，獲劉家輝大讚好聽。
樊亦敏續說：「師傅（劉家輝）好貪靚，專登揀自己鍾意嘅衫同戴咗隻至鍾意嘅手錶出席，見到朋友部紅色保時捷，又指住部車話要合照。由於佢好耐冇出席呢啲公開場合，所以全晚都好開心好興奮，仲做埋抽獎嘉賓幫手抽獎，後來佢自己又抽中咗200蚊現金獎，佢都攞番出嚟等大家再抽過。」劉家輝在盆菜宴受歡迎，不停被集郵。
活動上劉家輝跟一眾嘉賓和工作人員大合照。
劉家輝未中風前身手了得，曾與奧瑪花曼拍《標殺令2》。劇照
讚樊亦敏歌藝
另外，大前晚除樊亦敏上台做表演嘉賓外，早前跟她與康華三個盛女合唱《伊人當自強》的馬蹄露也有上台表演，二人並合唱此曲。劉家輝見到樊亦敏唱歌時笑住拍手掌，樊亦敏說：「聽番啲朋友講，師傅話我唱得幾好聽喎。」
採訪：魯吉
from:
http://hk.apple.nextmedia ... 161213/19863211
