昨日除咗係亞視熄機嘅日子，都係無線劇集《愛·回家》嘅大結局，做到995集終於完喇！之後呢，都係做《愛·回家之八時入席》，不過冇咗馬家陪住大家送飯嘅日子，舊人冇得留低，轉由毛舜筠、黎耀祥擔大旗。
講返昨日結局嘅《愛》劇，曾創下佳績，收視一度超越黃金檔期劇集，不過種種原因要被結束，喺噚晚嗰集同Anson（張振朗）拉埋天窗嘅樂兒（龔嘉欣），喺微博仍然依依不捨，係咁開post懷念，先係同大Sir（劉丹）示愛：「太多洋蔥，來一點搞笑……愛回家，三大帥哥，叫我如何不愛他們呢？不過我最愛的都是大Sir。」之後佢多謝三位同佢一齊加入嘅何君誠、張振朗同坤哥。
至於昨晚結局，就係講番前晚Anson（張振朗）同樂兒（龔嘉欣）仲有馬子妮（蔣家旻）同許冬豪（李豪）齊齊拉埋天窗，返屋企之後發現唔見咗馬家好（徐心怡），馬家出動搵家好，途中仲有其他曾經喺《愛·回家》出現過嘅人出嚟幫手，最後就喺屋企搵返家好，最後就梗係一家人攬埋一舊。
最老土嘅係故事完結之後，佢哋由《愛·回家》跳返出嚟做自己，宣傳下星期嘅《愛·回家之八時入席》之後仲走出去一齊跳「開心舞」。
from:
http://hk.apple.nextmedia ... 160402/19555151
