偶像服侍
當客人發現招呼她的是偶像Steven 後，先是錯愕，繼而驚喜。而Steven 則保持鎮定，繼續專心執枱。
英皇男子組合Sun Boy'z 自重組以來發展平平，故今年英皇將成員William （陳偉霆）以單拖出擊，並集中火力催谷他上位做08新人王，令其餘兩名成員Steven （張致恆）及Dennis （麥子豪）備受冷落，工作量亦隨之減少。
要維持生計，惟有靠自己諗計。本刊發現Steven 不得不放下藝人身份，在銅鑼灣一樓上cafe 做兼職侍應，由樓面到洗碗乜都要做，無非為賺時薪$50的微薄薪酬。金融海嘯掀起裁員減薪潮，藝人都要馬死落地行。
上周一（15日），Steven 在銅鑼灣駱克道樓上cafe 「Termini 」開工，記者見他工作非常賣力，除對客人殷勤招呼外，執枱送餐亦甚有效率。而最意想不到的是，Steven 除做樓面工作，連廚房洗杯碟工種都做埋，為生計完全將偶像身份拋諸腦後，樓面打雜一腳踢。
12月15日
阿四一腳踢 招呼殷勤
做侍應的Steven 禮貌周周，客人落order 或是結帳走，他都講聲：「多謝晒。」又主動向客人推介飲品。故那女顧客待他行開後，對朋友說：「原來佢咁好禮貌。」
快手執枱
過往被公司指為懶人的他，當起侍應卻十分戮力，執枱抹枱，甚具效率。
廚房洗碗碟
除了樓面工作，Steven 仲要入廚房洗埋碗碟，難得佢唔介意，仲邊做邊跟同事吹水，企響bar 枱抹餐具時，更笑住同人講：「一年響屋企洗嘅碗碟，呢度一日已經洗夠數。」識得苦中作樂，佩服。
Cafe 老闆：佢好勤力
據知，今個月初他才開始上班，日薪400元（時薪$50），一星期返兩至三日，由下午4時做到凌晨12時收工，做足8個鐘。該樓上cafe 開業約五年，陳栢宇、官恩娜也是常客，而Steven 過往亦經常在此打躉，跟cafe 老闆如朋友般熟絡，故他需兼職賺錢，便選擇在此工作。「自從英皇要捧William ，Sun Boy'z 其餘兩個成員都少咗job 接，就算有，好似平安夜Sun Boy'z 去廣州做騷，酬勞都只係2萬蚊左右，仲要3個人分，每人得幾千蚊，收入好有限。好在Steven 教友高皓正偶然搵佢做下布道會表演，但始終酬勞唔高，所以要搵份工幫補吓。」知情者說。
12月19日變回藝人
據知當日原本要在樓上cafe 返工的Steven ，因被英皇拉去撐場，出席電影《梅蘭芳》首映而要向cafe 臨時告假。
草根家庭
仍然住在觀塘公屋的Steven ，出身草根家庭，父親以前在地盤做散工。本來賣雞為生的荷蘭籍母親亦因禽流感轉行賣菜，收入微薄。家姐張詠恩（中）原本是Juno 所屬的經理人公司「Silly Thing 」旗下歌手，曾加入女子組合「Krusty 」但出道3年就拆夥，現轉行做時裝品牌「2%」公關，她已搬出觀塘公屋，細佬張致良（右）做兼職model ，收入不穩。故與父母同住的Steven 出道以來都要擔起養家責任。
去完《梅蘭芳》首映，Steven 返屋企換件衫就落街練跑，為出戰明年二月嘅馬拉松長跑賽準備。練跑前，Steven 響觀塘翠屏村寓所樓下先拉筋。
英皇歌手各搵出路
鍾欣桐 做形象顧問
鍾欣桐自淫照事件後復出無期，全年只曾到荷里活拍攝電影《W 》和偶爾出席內地的慈善活動。早前有指阿嬌以自己多年經驗和潮流觸覺，為師妹泳兒和鍾舒漫充當形象顧問。
蔣雅文 台灣開舖
2007年4月蔣雅文(Mandy)與李逸朗（Don ）分開發展後，推出首張個人專輯。至08年5月Mandy 突向公司請假半年到台灣修讀室內設計，但半年來Mandy 一直專注時裝設計，與友人建立了自家品牌「Little Secret 」，在網上和當地售賣。
李逸朗 開酒吧
2007年10月尾，李逸朗（Don ）推出全新大碟《Don Li 李威樂》，但成績一般。今年二月Don 與友人在銅鑼灣合資開設酒吧，生意不錯。另外，他又在陳海琪開辦的網上電台主持節目。張致恆
