過氣情人鄭秀文（Sammi ）和許志安，前晚在東亞華星演唱會碰頭成為全場焦點，而Sammi 宿敵楊千嬅先後以多套露肩露背裝上場，再拍型男尹子維跳舞鬥搶鏡，可惜千嬅始終敵不過Sammi 和安仔，兩人不但隔空合唱飲歌《唯獨你是不可取替》，更公然打情罵俏，成為全晚高潮。
一眾歌手前晚到亞洲國際博覽館演出首場「東亞華星演唱會」，當晚焦點當然落在過氣情侶鄭秀文和許志安身上。甫開場先由成班歌手包括安仔、楊千嬅、何韻詩、王菀之、劉浩龍、黃宗澤、農夫及at17等一同出場。之後千嬅、阿詩及安仔演唱《飛躍舞台》，接著眾歌星再合唱一曲《火熱動感lalala 》，但惟獨不見鄭秀文。
安仔和Sammi 隔空合唱《唯獨你是不可取替》，安仔更高舉手指公大讚Sammi 。
Sammi 演出時配合煙花效果，更能襯托起她的一姐地位。
千嬅攬仔辣舞
阿詩單拖打頭陣，之後再到安仔出場，他一口氣連唱十多首華星年代金曲，當唱到他和Sammi 的飲歌《唯獨你是不可取替》時，觀眾一度以為Sammi 會出場，fans 高舉寫著「Mi 」的紙牌，但Sammi 並沒有現身合唱。千嬅當晚出場次數最多，她亦先後換上多套露背和露肩裝搶鏡，她更拍住型男尹子維合唱《只怕不再遇上》兼跳貼身舞。換衫後千嬅再度上場，她不忘賣口乖說：「多謝林生（林建岳）令我哋可以唱番以前華星啲歌，可以由《少女的祈禱》唱到《中女的祈禱》，多謝佢令華星復活。」Sammi 壓軸出場，觀眾反應熱烈，fans 更大叫安仔，Sammi 由16位舞蹈員陪同下勁歌熱舞長達8分鐘，但唱完後Sammi 有點索氣，她說：「好唔好玩？大家要叫吓先抵，我同意千嬅講過句，今晚係華星同東亞結合，我唔想講華星有幾耐歷史，因為我唔想爆我係中年婦人嘅秘密，但我唔可以唔提一個人，佢係華星始祖，生命中嘅好朋友，佢離開我哋，而家我要唱畀佢聽，但因為佢唱得太好，我有壓力，希望佢感受到我將心意送畀天上嘅佢。」Sammi 即唱出梅艷芳的《女人心》。之後Sammi 唱《唯獨你是不可取替》，中段時聽到安仔聲音伴唱，但卻不見安仔上台，尾聲時大銀幕一邊是安仔高舉手指公在和音群中伴唱的情景，而另一邊是Sammi 開懷大笑，兩人雖然只是隔空合唱，但都令全場起哄。
千嬅穿上露肩裙拍住型男尹子維合唱之餘還大跳貼身舞。
王菀之悉心打扮落力表演，美妙歌聲令台下觀眾聽出耳油。
分享開心回憶
左起：阿詩、Sammi 、安仔和千嬅同台合唱，但焦點難免會落在一對舊情人身上。
最後Sammi 終於和安仔同台，但兩人夾住阿詩和千嬅，四人大唱張國榮、阿梅及羅文的金曲，Sammi 和安仔不時互相對望，唱完後Sammi 叫安仔開口說話，她笑言：「論年資應該係你講。」安仔聞言說：「係，呢度我係老XX 過個。今晚分享開心回憶，諗番拼嘅時候，邊個坐喺我身邊，邊個同我傾偈，邊個係我最好朋友。」Sammi 即插嘴說：「我咋。」安仔表示：「你哋誤會，你估而家最感動係乜嘢位？」阿詩即笑說：「你最感動同我合唱。」安仔回應：「唔好再係咁，唔好成晚係咁，我好認真。」Sammi 隨即替安仔出氣作狀打阿詩。最後全部歌手合唱《浪淘沙》，Sammi 和安仔有互搭膊頭狀甚老友，跟之前綵排生疏判若兩人。採訪：馬建華攝影：仇志德
Sammi 和安仔雖然已很久沒有同台演出，但依然默契十足。
