江若琳（Elanne ）早前被指為寰宇電影老闆林小明和太太趙雪英婚變的第三者，令她苦心經營的純情少女形象盡毀，雖然Elanne 一直受千夫所指，但最終因沒有真憑實據，令事件告一段落。萬箭穿心的日子，Elanne 慶幸全賴有鍾舒漫真摯的短訊以及小肥的關心，令她在冰冷中感到溫暖。 撰文：比華利
《是非篇》
尚有一個月便踏入09年，今年對於江若琳來說可算經歷了一個大考驗，演藝事業剛見起色的她，便因捲入所屬寰宇電影老闆林小明和太太趙雪英的婚變傳聞，令形象插水，至林小明自揭離婚與錢銀有關，終令事件畫上句號。對於入行才兩年的Elanne 來說，過去幾個月，面對每天不絕的負面新聞，重重壓力令她透不過氣，每晚回家都以淚洗臉，精神接近崩潰，讓家人十分心痛，現在回望那段日子，Elanne 不禁仍打冷顫，她說：「過段日子真係好可怕，我真係唔敢諗番轉頭，可以嘅話，我真係好想將呢段記憶完全刪除。」
感謝好友收大量短訊支持
要真正克服心魔，最佳辦法還是勇敢面對，Elanne 坦言當時全賴身邊好友和歌迷支持，面對暗箭，慶幸仍有圈中知心友雪中送炭，Elanne 表示有三個人不得不多謝，她說：「首先，當然好感激媽咪，佢一向好低調，好反對我入娛樂圈，但為咗鼓勵我，都企出嚟撐我。」除了血濃於水，友情同樣可貴，Elanne 說：「好多謝Sherman （鍾舒漫）一直默默支持我，可能我哋係同期新人，佢對我情同姊妹，過段日子，佢每日都發大量短訊支持我。記得我唔開心，一接到佢來電，我啲眼淚就唔停標出嚟，再聽埋佢把聲，我就喊到收唔到聲，搞到Sherman 次次打畀我都好驚令我情緒失控，佢每次都會講：『你要撐住』，呢句話令我百聽不厭，好窩心好溫暖，感受到人間有情。」
老闆林小明（右）和趙雪英離婚，江若琳成為嫌疑第三者。資料圖片
笑容清純可愛的江若琳，自言早前因是非不斷幾乎崩潰。
禍福難定負面新聞催成熟
被指是狐狸精，江若琳經常在鏡頭前哭。資料圖片
除了鍾舒漫外，Elanne 對小肥也無言感激，她說：「佢好好人，成日都借隻耳仔畀我傾心事。」經常訴心曲，難道不擔心會傳出緋聞嗎？Elanne 說：「我哋絕緣㗎，小肥係我好兄弟，又係我好姊妹，我襯唔起佢，佢人品太好，小肥係朋友嘅開心果，大家一見到佢就會開心晒。」被指是第三者，Elanne 坦言此事榨乾了她不少眼淚，但轉頭再看，經一事，長一智，她認為大堆新聞令她火速成長，Elanne 說：「我問心無愧，呢個經歷，令我整個人老積晒，個人嘅思維心態最少喺短短過個月成長咗10歲，經理人同我講，只要捱過呢一關，我就會變得成熟，以後再遇到乜嘢風浪同困難，都可以輕鬆面對。」其實Elanne 未入行時看到藝人經常說要食得鹹魚抵得渴，她現在堅信未來日子自己也可以撐下去。
《夢想篇》 憧憬婚姻自爆冧仔食檸檬
現年21歲的江若琳，雖是新一輩少男殺手，但她的感情生活卻交白卷，Elanne 樂得多趁這段時間，為演藝事業作衝刺。Elanne 出道至今，先後與阮民安、吳卓羲、陳柏宇和寰宇老闆林小明傳緋聞，但這班緋聞男友原來統統不符合Elanne 的擇偶條件，她說：「揀男友嘅話，我對靚仔係冇反應，我欣賞男仔待人細心，識得關心我，因為我係一個好唔識照顧自己嘅烏龍王。」
盼30歲出嫁
Elanne 認為做得她男友，一定要陪她承受各方壓力，她又說：「佢要接受我嘅職業係藝人，工作同作息時間好唔固定，忙起上嚟，我唔止冇時間見面，就算傾個電話都可能好難，所以我揀男友必須經過深入了解先可以畀對方發展機會。」但Elanne 對將來婚姻生活仍有憧憬，她說：「其實我好羨慕Kelly （陳慧琳），見到佢同鍾意嘅人結婚，共同生活，佢哋外形靚仔靚女，畀人好恩愛嘅感覺，真係好似住喺城堡嘅公主同王子。」Elanne 計劃2017年可以擁有自己的家庭，她說：「到時我都30歲，希望可以嫁得出，組織咗自己嘅家庭，做個稱職嘅主婦，相夫教子，我仲諗定要生兩個細路，最好一仔一女，因為我都恨做媽咪。」
與吳卓羲合作拍劇曾傳緋聞，但江若琳直言對靚仔沒興趣。資料圖片
江若琳入行前的樣子跟現在相差頗遠，難怪中學時被男同學請吃檸檬。
被拒匿埋喊
Elanne 的笑靨是撒手
，迷死不少男生，但學生年代的她，卻吃盡男同學給她的檸檬，每次出擊都失敗而回，她自爆瘀事說：「中學時，我試過主動出擊追求心儀嘅男同學。」她的冧仔攻勢是狂發傳情SMS 、摺星星和贈送心思小禮物，可惜都不能感動男生，她說：「佢哋一啲反應都冇，我當時都好唔開心，仲試過匿埋屋企喊。而家諗番，都覺得自己好幼稚同搞笑。」
《得失篇》 自知之明全靠是非贏人氣
經歷過是非纏身後，Elanne 最近已投入工作，前晚她與好友鍾舒漫及其他樂壇新晉歌手，到九龍塘出席年輕人雜誌頒獎禮，其中Elanne 得到「人氣急升女Idol 獎」，問她覺得自己人氣從何而來？Elanne 直認說：「我覺得都係因為負面新聞，不過真係唔需要喇。」之前有傳她在某佈道會中和趙雪英碰面，Elanne 表示自己當日見不到林太，她強調不想依靠負面新聞來維持曝光率。
15年約冇得走
Elanne 認為自己過去一年又拍電影又拍劇，加上經歷不少是非，故此令她成熟長不少，她寄望明年可以有好開始，她說：「希望09年唔好再有傷害性嘅新聞。」問到和前林太的關係是否已沒有之前惡劣？Elanne 謂不想回應，以免講多錯多，問到可有考慮跳槽？Elanne 說：「我仲有10年約，5年生5年死，之前一簽就15年呀。」採訪：李珮洳攝影：陳俊強
前晚江若琳於年輕人雜誌選舉中獲人氣獎，她不諱言是負面新聞帶挈。
江若琳希望將來的男友懂得貼心照顧她外，還要支持她的演藝事業。
娛樂資料庫：玉女變新聞女王
江若琳早兩年憑大眼睛和甜美笑容殺入娛圈，清純少女形象迷倒少男，不過早前因牽涉入老闆林小明婚變，加上整容追仔傳聞不絕，玉女變是非之女。
整容風波
被翻舊賬，指其樣貌與05年主演電影《17歲的夏天》的扒女look （圖）判若兩人，早前一手發掘她的趙雪英指江若琳為求入行接受「改造」。
緋聞不絕
今年老闆林小明突傳婚變，江若琳被指是第三者。又被傳出道前曾力追同門師兄阮民安（Tommy 圖），兩人拍拖一年，女方上位後即提出分手。
誠信存疑
江若琳含淚否認搶人老公，更自揭銀行戶口只剩58元，但未幾卻被踢爆曾豪擲18,000元光顧美容療程，曾合作拍劇的吳卓羲更指她經常「萬歲」。資料來源：《蘋果》資料室
經過今年是非之年，江若琳自覺老了十歲，將來任何風浪也能輕鬆面對。攝影：林德雄髮型：James Lee （Hair ）化妝：Tammy Hau （Picturesque Gate ）服裝：Jill Stuart
專訪江若琳
