台慶頒獎禮零提名馬德鐘難忘低潮「我冇價值咋」
馬德鐘前年爭視帝大熱倒灶，結果鄭嘉穎俾人噓住都照搶走寶座；今年，馬小生竟然零提名，日前他接受訪問時提出疑問：「會唔會關親生仔事？」有否酸溜溜，馬小生心里有數，但仍堅持拒做高層飯局member ：「無端端嗌我食飯做乜鬼啫？我唔得咋。」無端端就唔得，識得就唔同。人生有低潮，難堪的日子更多，年前宣傳《衝上雲霄》時焦點落在其他演員身上，馬德鐘苦笑說：「我冇價值咋，唔紅咋。」 撰文：朱倬誼
事業篇
在剛結束的無線台慶頒獎禮上，一線小生馬德鐘竟零提名，他不致怨氣沖天，捧獎終歸是場實力持久戰，出爐視帝夏雨等足40年才開齋，何況馬小生！馬德鐘日前說：「可能今年得一部《原來愛上賊》，要反省自己演繹方法，定係唔關演繹事呢？關做人事？提名名單係公司講出嚟，唔係觀眾投票，咁冇辦法㗎。有提名就梗係開心，冇都冇所謂，託賴我拍完一套劇之後都仲有得做。」馬德鐘繼03年的劇集《衝上雲霄》後，06年憑《鳳凰四重奏》再上位，惡鬥那年膺視帝後被踩爆演技未夠班的鄭嘉穎。馬德鐘不認為是輸在緋聞太多損形象，他說：「會唔會關親生仔事（即指鄭簽約無線為經理人）？雯女（鄧萃雯）唔勝一線咩？（沒簽無線為經理人的雯女04年角逐視后敗在親生女黎姿手上）我明白遊戲規則。過時話我冇份嗱獎黑面，我真係冇，根本我預咗唔會有。你演戲都係畀觀眾睇，觀眾覺得OK ，我OK 㗎啦。」
演藝事業上數番起跌的馬德鐘，形容星途像過山車，不停上落。
《原來愛上賊》未能為馬德鐘在今年台慶頒獎禮帶來任何提名，他認為未必關演技事。 劇照
嘉穎長處係靚仔
鄭嘉穎前年捧走視帝獎，被網友狠批他演技未夠班。 資料圖片
馬、鄭同年爭獎，又先後跟佘詩曼傳緋聞，馬德鐘稱不介意且希望和鄭視帝合作。但談到鄭的演技，他笑一笑說：「我唔夠膽評論人哋，因為自己都唔係好好。演技嘅嘢好抽象，睇大家口味，睇乜嘢觀眾層欣賞乜嘢演員。佢長處係……靚仔，其實我唔太多睇佢嘅戲，你要我講，好難去講。」G4出身的馬德鐘已拍戲15年，他形容自己的星途如過山車般上上落落：「我係捱咗好耐先有一個機會，但做完之後又跌番落去，好多次都係咁。我覺得每一次都係試煉，道路唔平坦，就更加知道要做好自己嘅本份同演好啲戲，當回落少少之後，如果你冇演技、冇工作態度，就好難上番去。」馬德鐘未紅前，近磅做了溫兆倫及吳啟華的接班人，拍戲專做奸角壞蛋賤人。98年在王晶IIB 級電影《強姦2之制服誘惑》中，飾演變態色魔更入形入格，舐朱茵的一幕記憶猶新。被重提在《強姦2》扮色狼，馬德鐘倒大方笑說：「唔理好片、爛片，我都畀心機，希望大家睇到我嘅誠意。我覺得以過時年資係合格，唔錯㗎。」該段淪落到要接拍爛片的日子，可會是其事業低潮？馬德鐘妙道：「唔係低潮，都未高潮！」馬德鐘說他的事業低潮其實在於未站穩陣腳的時候：「拍《烈火雄心》第一集時係三線角色，跟住嗌我做番CID 甲！過時我唔係簽畀TVB ，佢冇一個計劃捧你，大家點理得你啫。」
不屑陪高層食飯
低潮有，難堪的日子更多，其中包括馬德鐘在劇中有叫好演出的《衝上雲霄》：「當時我做緊主角兩年幾三年，套劇差唔多出街宣傳時，記者只係問鎮宇、陳慧珊嘢，一係就過四條靚仔（吳卓羲、黃宗澤、陳鍵鋒、馬國明），完全冇人理我，就算影咗我相都唔出，我冇價值咋，唔紅咋。」現時不少小生花旦喜傍實高層食飯爭寵，馬德鐘參與次數有限。事實擺在眼前，陪食飯送賀禮確可博取機會，馬德鐘自言非同道：「無端端嗌我食飯做乜鬼嘢啫？我唔得咋，可能我失咗好多機會，起碼我活得開心。」
馬德鐘寧願失機會，也拒做高層傍友。
年前馬德鐘跟吳鎮宇（右）合演《衝上雲霄》，一度令他火速上位。 劇照
愛姣佘唔吼狐妮
家有靚妻和囝囝的馬德鐘近年緋聞成籮，無線花旦郭可盈、陳慧珊、郭羨妮、佘詩曼和曾與他拖手遊泰國的圈外女伴等，先後跟他傳緋聞，令住家男人形象受損、事業插水，幸他臨崖勒馬，戒蒲戒媾女跟老婆張筱蘭箍煲，成功度過婚變危機。
佘詩曼魅力逼人，馬德鐘也直認對她動情。 資料圖片
馬德鐘和郭羨妮合演《爭霸》一劇時，曾傳緋聞。 劇照
「我哋岩傾啫」
馬德鐘自稱緋聞全部是假，信不信就見仁見智。
馬德鐘自稱緋聞全部是假，信不信見仁見智，但以下所說的怕且是真，他說：「我演戲時會好情真，我唔知人哋啦，我會好投入角色，喺個角色入面真係好鍾意佢。基本上每一個同我做partner 嘅，我都會愛上佢，先做到感情戲出嚟。」那一位美女令他最有feel ？他說：「有幾個都幾好，陳慧珊、阿佘同可盈。」阿佘被封「姣佘」，馬德鐘卻不覺得阿佘姣，她說：「佢係女中豪傑，我哋岩傾啫。」他承認拍戲時對阿佘動過真情：「拍過時一定要啦，你係入咗角色。」馬德鐘沒有提「狐妮」郭羨妮，但拍古裝劇《爭霸》時跟她朝夕相對，怎會沒一刻迷惘？況且太多男人對她嗒糖，馬德鐘說：「我冇。咁恭喜佢，佢應該嘅，港姐冠軍、華姐冠軍，吸引人係應該嘅。」又為甚麼他不嗒糖？他說：「大家同事，同事一靚就嗒糖咪好唔掂？」身邊美女如穿花蝴蝶，拍感情戲日夜癡纏，基於雄性動物本能，馬德鐘應該思想作反，心野身痕。他說：「我覺得唔需要有呢種心野，可能一般人有，但我嘅心野已經發揮喺演戲上，你每次都要將感情投射喺對手身上，雖然係假嘅，但要付出眼淚、感情、精神，要痕都係心理上釋懷咗啦。」
未必係好老公
去年馬德鐘緋聞纏身致事業插水，他屢次帶妻兒曝光救形象。 資料圖片
馬德鐘說太太一直給予他體諒和支持，從不大興問罪之師。不過傳緋聞那段風雨飄搖的日子過後，問他是否跟太太患難見真情，他卻說：「係大家覺得風雨咋，其實我哋一路嘅關係唔錯，而家感情好咗，係大家成熟咗，早年會為一啲事嘅觀點與角度去拗，拗到面紅耳赤，唔睬一日兩日，但床頭打交床尾和。而家？算啦，你岩晒啦。原來你退後一步，佢又會退後一步，我哋嘅相處之道係容忍、溝通、欣賞，你問我佢係咪100分嘅老婆？佢絕對係。但我未必係一個好老公、好爸爸，因為我唔係好多時間可以付出畀佢哋。」
馬德鐘與視帝獎項無緣，歸根究柢關「親生仔」事，難怪他要向現實妥協賣身無線。攝影：仇志德場地：香港港威酒店La Brasserie Restaurant
