10月20日33B 變35G 當日，蔡少芬與《飛》劇人員試造型兼拍節目巡禮，剛為人妻的蔡少芬，不惜挑戰性感極限，加胸墊谷胸上陣兼在胸前畫上蝴蝶紋身，搏到盡！
蔡少芬六月與合作了十二年的經理人Helen 結束賓主關係，呢頭話要學習獨立，轉頭已四出搵好碼頭。據知近日她跟無線高層樂易玲密密斟洽簽約事宜，為表誠意，樂小姐先來個拋磚引玉：「黎姿退出，接唔到嘅工作，我會介紹俾Ada （蔡少芬）。」
未正式簽做親生女，蔡少芬已嚐盡甜頭，成功執黎姿二攤做明年重頭劇《飛女正傳》（暫名）女主角，更是三王襯一后，劇中她要谷G 奶，又要扮醜女，極大機會憑此劇角逐女主角獎，擔定櫈仔等嗱視后！
《珠光寶氣》劇照
《火舞黃沙》劇照
06年蔡少芬同黎姿在《火舞黃沙》爭視后，爭到火紅火綠，近來宣傳《珠光寶氣》十指繄扣好姐妹姿態示人，兩個均是好戲之人。
加胸墊變G 奶的Ada ，負荷太重奔跑時竟出現墮奶。
當發現記者拍照，Ada 為免造型曝光，即匿在人堆後。
近日，黎姿宣布退出娛樂圈，令剛回復自由身的蔡少芬冷手執個熱煎堆，取代黎姿成為無線一姐。其實，黎姿一直深得無線高層樂易玲及金牌監製戚其義器重。重頭劇如《金枝慾孽》、《火舞黃沙》及《珠光寶氣》，她的戲份都最重。
Ada 變身索女後，周旋三男之中，其中一個是黃德斌。
拍攝節目巡禮，監製戚其義都親自監督睇到實，當然啦，公司話明係09年重頭劇喎！
Ada 的「All back 」頭及Deep V 裝勁似93年張曼玉在《東方三俠》的造型。
三王一后谷上位
不過，黎姿退出後，無線將以蔡少芬接棒。知情者話︰「阿戚計劃明年開拍重頭劇《飛女正傳》，本來個角色意屬黎姿，連劇本都為佢度身訂造，因為劇中女主角會由一名大籮平胸嘅醜女，變身後成G 奶神奇女俠，齋睇造型已經好搶，咁愛美神黎姿做就啱晒啦。最難得仲係由三個小生陳豪、黃德斌同曹永廉傍住，一后三王。不過Gigi （黎姿）9月尾正式向監製辭演，咁樂小姐咪提議搵Ada 頂上囉，仲叫阿戚幫Ada 改吓個劇本添！」
就蔡少芬頂替黎姿拍劇一事求證戚其義，他說︰「唔係，Ada 唔係執二攤，一直係搵佢。套劇12月底拍，好多嘢仲度緊。（咁Ada 個胸同籮嘅效果仲會唔會誇張啲？）因為係喜劇，都想誇啲突出啲，陳豪仲會染白髮添。」
其實，蔡少芬即將成為樂小姐新寵，所以她簽約無線機會極大。六月初，蔡少芬單方面向外宣布，經理人Helen 患婦女病，為免加重其負擔，又適逢合約屆滿，所以不再與Helen 的「L&P 」公司續約。回復自由身，擺明是鋪路入無線做親生女。
10月20日開心過黎姿 10月20日晚，黎姿宣布退出娛樂圈，全程由「好姐妹」蔡少芬十指緊扣陪伴，Ada 比主角表現更興奮。
當日所見，黎姿、樂易玲及蔡少芬一早已在化妝間咬耳仔兼拍合照。蔡少芬與樂小姐的關係，可謂突飛猛進。
蔡少芬早前和張智霖拍大陸劇《勝者為王2008》。該劇在亞視播，Ada 為免惹怒無線，缺席劇集宣傳。
御准登台搵真銀
由於蔡少芬過往的劇集有收視保證，如04年由她擔正的《棟篤神探》是當年之冠，收視最高39點（約254萬觀眾）。蔡的演技亦受到觀眾認同，形象亦正面，故樂易玲銳意拉攏她成為親生女。不過在外闖了十二年的蔡少芬，除了要求拍劇角色有發揮外，更注重廣告、登台的搵真銀機會。Ada 友人透露：「近年Ada 響大陸算吃香，佢怕要日拍夜拍，無機會返內地做嘢減少收入。不過樂小姐就應承俾佢出外搵銀，仲用黎姿做例子，話TVB 劇令佢響大陸、香港都人氣勁，啲廣告多到接唔晒，Ada 當然心郁郁。」
就蔡少芬簽約無線求證樂易玲，她表示：「哦！佢啱啱去咗北京拍嘢，要等佢返嚟至傾，不過，佢一返嚟就要即刻幫我哋拍嘢，總之一見面就會傾。（咁邊啲本來係黎姿嘅廣告介紹咗俾Ada ？）詳情就唔可以講。（點解來年嘅重頭劇唔搵親生女拍，反而搵Ada ？）總之係好嘅演員，我哋都會合作。」雖然未正式做無線親生女，但樂小姐對蔡少芬的行蹤咁清楚，睇得出佢哋關係好密切。
而近年甚少性感的Ada ，為了報答樂小姐知遇之恩，亦罕有谷胸演出。十月初，蔡少芬為《飛》劇首次試造型時表示：「今次絕對超過咗我嘅性感極限，我當年參選港姐就知自己身材有料，不過好嘢當然留俾老公，所以我會將所有造型俾佢過目，要得到老公同意至得。」
Ada 的巨籮是穿了5條棉褲後的效果，她笑稱：「依家生十幾個擺足5圍酒都冇問題。」旁為染了白髮的陳豪。《蘋果日報》圖片
蔡少芬本來是有料之人，為了拍劇要
胸，加上要著5條褲，令她大叫辛苦，不過有得出位爭視后，乜都抵番晒。《蘋果日報》圖片
大籮女變神奇俠
《飛女正傳》是一部廿五集的喜劇，蔡少芬擔正女主角，角色表面是個普通女子，樣貌平平，平胸大蘿，但突然擁有超能力，變身後成為大胸索女，由本來怕事錫身的港女，變成睇得兼打得，四出捉賊，好打不平的正義女俠。
愛情上，由本來醜女無人吼，變身後惹來狂蜂浪蝶，更用超能力分身一腳踏幾船，周旋於陳豪、黃德斌和曹永廉之間。
一線花旦缺貨
無線近年出現花旦青黃不接現象，惟有靠外援，包括生完仔的袁詠儀，甚至之前不再續約，傳不和的郭可盈等，都斟掂數返娘家拍劇。
《蘋果日報》圖片
胡杏兒 演技屎
胡杏兒是樂易玲的愛將，並度身訂造在《肥田囍事》擔演肥田這個討好角色，可惜演技備受批評，多年來沒有進步，網民齊插並封她做「胡冏冏」，新劇《當狗愛上貓》更被飛出角逐視后名單。
《蘋果日報》圖片
郭羨妮 衰狐妮
郭羨妮曾被樂易玲點名讚眾多花旦最靚女。可惜年前介入有婦之夫陶大宇婚姻之中，郭肯斬情絲認錯，得到無線原諒，拍住郭晉安的《古靈精探》，反應不錯，明年拍續集，但要成功洗底，仍需一段時間。
佘詩曼 緋聞多
去年佘詩曼成為「我最喜愛」、「最佳」女主角的雙料視后，本來有望更上一層樓，但之前跟形象花弗的陳浩民藕斷絲連，又同有婦之夫馬德鐘傳緋聞，最近又傳介入鄭嘉穎和周麗淇，被指做第三者，搞到形象大跌。
《壹週刊》圖片
廖碧兒 衰自大
今年四月時，有傳跟無線尚有年多合約的廖碧兒，自以為是公司最賺錢藝人，因不滿無線另捧鍾嘉欣及陳法拉，決定不再續約，因而惹怒無線，即時被踼出《舞動奇蹟》，被放入雪櫃。
《壹週刊》圖片
蒙嘉慧 唔應酬
蒙嘉慧自跟鄭伊健拍拖後，自以為身價升級，被傳經常在片場扮阿姐，又多次公開話自己唔鍾意應酬，唔會討好上司，性格咁我行我素，難怪不獲高層歡心。
