藝人講股：鄭嘉穎40蚊入國壽低位溝貨
鄭嘉穎之前曾經公開講過話喺股票市場輸咗成百萬，噚日陸菲特同佢傾開股票，問佢呢排有冇買貨，佢話：「上個禮拜五19蚊入咗中國人壽（2628）、$2.9同時買咗工商銀行（1398）同建設銀行（939）。呢兩日三隻股都升咗唔少，國壽今日收$21.3，工行收$3.65、建行收$3.79，賬面都有利可圖，但溫家寶總理話明會撐香港個市，我想睇多兩日先決定放唔放。」陸菲特就同嘉穎講呢排個市太波動，今日升，聽日可能又會跌番，勸佢見好就收，佢話：「之前因為高追咗國壽，用差唔多40蚊買入，所以上個禮拜五只不過係溝貨。至於工行同建行，去到4蚊就會走啦。」嘉穎話之前賬面輸百萬股票，其實呢啲股票仲未賣，佢只不過係轉咗媽咪個名，擺喺媽咪個保險箱。問佢呢批係乜股票，佢話：「有國壽、匯豐（005）同中國銀行（3988），不過都係高價買，所以都係擺埋佢，等做退休金啦。」撰文：陸菲特
