無線捧紅人有計，鄭嘉穎林峰黃宗澤個個獨當一面，不過更多淹沒人海冇人知，05 年香港先生彭冠期就係其中一個。
除了傳過同林保怡發展秘密友誼，對彭冠期印象確係薄過紙。不甘平淡唔跟無線續約轉投電影《無野之城》老闆雲翔公司，仲豁出去同新老細齊齊影全裸寫真深得佢歡心，背靠老細彭冠期吐冤氣插爆無線大細超冇關照。
剝唔係女星專利，男星影激照都有出路！
寫真集其實是電影《永久居留》的劇照，老闆雲翔（左）同彭冠期（右）都冇係戲入面出現，不過兩人在寫真內就粉墨登場模擬電影內場口。突然睇中彭冠期，雲翔直說不介意人地以為佢包仔：「唔可以用包來形容，我係簽左佢，佢好適合我既戲，我唔介意人地話我基，話我雙性戀都得，你鍾意點講咪點講lo ！」
邂逅月曆
彭冠期因為07 年在林保怡母親喪禮中，戴孝為林母燒衣而傳為保怡密友，彭冠期說：「我地因為幫TVB 影07 年月曆而識既，當年保怡阿媽中風不良於行，我就教佢媽咪做D康復運動，所以同佢阿媽感情好好。」
０５年選香港先生奪得「最突出表演個人大獎」的彭冠期，同林保怡傳出同性戀緋聞算係佢代表作。至今年7 月約滿無線後，彭冠期立即轉投股神老闆，並專出品基味電影如《無野之城》的雲翔的電影公司旗下，仲唔驚俾人話係同志傍住雲翔拍了一輯全裸寫真，彭冠期說：「我同老闆係模仿自己公司套新戲《永久居留》中兩位男主角拍模擬劇照，係我角度呢輯相好有藝術味。」
曾做健身教練的彭冠期05 年參加第一屆港男選舉，當年輸左畀高鈞賢，之後簽約無線，做過大茄同兒童節目主持，發展唔理想難怪佢咁好火。
月賺四千點夠使？
離開大台第一擊就搏到盡，原來彭冠期係無線好受氣：「我覺得我位經理人好唔尊重我，上年7 月我去左北京拍《新小李飛刀》3 個月，扣埋20 ％既佣金，每個月得4 千幾蚊，嗌佢幫我叫高少少價，佢竟然話：『你拍就拍，唔拍就算啦，大把人爭住拍！』你話火唔火先，套劇個總經理叫TVB 搵我做第二男主角，但個經理人又再拿幾個藝員資料畀佢地，最後變左敖嘉年，唔明點解唔畀個機會我lo ！」
冇電話點接job ？彭冠期愈講愈火滾：「經理人連我手提電話都唔知，3 年都冇幫我接過job ，咁算咩經理人，根本係度玩緊我。」屈左3 年滿腔怒火，不過林峰都做過幾年老臨喎，希望你今鋪全裸博到啦！
前老細偷望
前員工赤裸控訴，無線總經理陳志雲眼尾睄到D寫真相，就即刻雙手插袋，陳總話：「我要睇左戲先可以comment 喎，睇左套戲先啦！你記住呀，我真係冇認真睇過wor （指寫真相），唔好屈我呀！」
新老闆攬實
志雲唔重用，新老闆雲翔就錫到佢 ，佢話：「我覺得佢好有天分喎，我套戲都預左佢做第二男主角，無線唔識用人者！」
寫真內彭冠期（右）有大量全裸鏡頭，不過佢就話：「其實呢輯相係藝術界好平常者，又唔係冇過樣整過樣，我覺得冇乜野喎！」
Osman@EO2 先係主角
彭冠期本寫真集內容其實係雲翔新戲《永久居留》的模擬情節，兩位正印主角EO2 的Osman （洪智傑）和model 阿Sean 演繹一對同性戀情侶，雖然是同志文藝片，而且全片超過十個男人有全裸鏡頭，應該好快成為同志界話題，雲翔真係好識針對市場喎。
Osman （左）跳舞叻，原來拍戲都可以好大膽，而阿Sean （右）本身為model ，雲翔話：「有次食飯見到佢（Sean ）覺得好適合，咁佢學戲反應都好快！」
Osman 同Sean 夜麻麻去海灘拍裸泳，仲要光脫脫訓係浮台，咪睇佢地咁梳乎，其實當晚只得十度，Osman 話：「凍到抽筋仲要扮輕鬆。」
見到相集有自己份，Osman （左）即刻話：「其實我之前睇過啦，D相好靚，導演同彭冠期都係模擬我同阿Sean 係戲入面既角色。成套戲都好自然呀，全部場口都係有必要，唔係賣弄色情架。」
口味一致保怡
老闆雲翔揀男仔有一手。上次《無野之城》用左香港棒球員，票房一般不過總算有noise ，今次仲搵左大隻港男彭冠期影全裸，原來佢下個首選同樣係林保怡，你同彭冠期口味又幾夾喎！
郭富城「論級數、靚仔、身形Aaron 係首選，有機會想搵佢合作，我簽彭冠期都係因為佢好似後生左16 年既Aaron 咁，一樣有性格、有經歷。」
林保怡「之前睇晒佢全輯《金枝慾孽》，覺得佢同一般電視演員既演繹方式唔同，諗唔到第二個好過林保怡咁有內心戲，影寫真同拍戲都好good 。」《忽然1 周》圖片
鄭嘉穎「鄭嘉穎係電視圈咁多年，電視味較為重，未必達到我要求既電影感，靚仔同身形梗係重要啦，不過要戒電視味先得。」《蘋果日報》圖片
