林保怡、Joe Junior同劉丹等人噚日到西貢出席盆菜宴，咁啱佢哋三個都有份演出近日重播嘅《天與地》。而喺《天與地》飾演鼓佬嘅林保怡喺現場就同溫拿嘅鼓佬陳友同台合唱。
去年主力返內地拍劇嘅保怡話上年買咗樓，近日聽講已經升咗200萬，佢強調自己買嚟自住，冇諗過炒賣。
馮仁昭講起近日無綫劇集《老表，你好嘢！》引嚟唔少討論，保怡就話冇留意，仲反問有邊個演員做。當保怡聽到歌手王菀之都有份拍，佢忍唔住講：「王菀之都拍劇？咁唔夠人呀！」
真假鼓佬陳友同林保怡唔打鼓，反而爭咪爭唱歌喎
Joe Junior（左）同王俊棠噚日喺活動上碰面，扮鬼扮馬影合照
日夜播舊作
劇中講到中港矛盾，近年返內地搵人仔嘅保怡話返內地做嘢絕對冇問題同冇文化衝突，反而覺得自己嘅普通話未到水準，劇集出街時都要配音。保怡事後話知道無綫中午重播佢10年前嘅作品《談談情跳跳舞》，晚上就重播《天與地》，佢話：「唔知大家係咪好懷念離開咗嘅林保怡呢？」另外《天與地》飾演Dr.Dylan嘅Joe Junior話晚晚都有重溫，因為第一次出街時拍緊劇冇睇過。
From:
http://hk.apple.nextmedia ... 130121/18141403
