左：同我鬥？你未夠班。（設計對白）
右：我背後大把人撐，一人一啖口水都浸瓜你。（設計對白）
無線仲有成個月至到台慶，但台慶劇已經陸續出籠。打頭陣嘅係邵美琪、黎姿、蔡少芬再加李司棋嘅《珠光寶氣》；跟住下個禮拜一（27號），接《少年四大名捕》，係阿姐汪明荃同佘詩曼嘅《東山飄雨西關晴》。
西關少爺呢個稱號，聽就聽得多，早前張智霖同佘詩曼都曾經拍過一套叫《西關大少》嘅電視劇。今次《東》唔係講西關大少，而係講佘詩曼呢個家道破落嘅西關小姐，靠賣艇仔粥而成為酒樓老闆嘅奮鬥故事；阿姐就由野蠻奶奶蛻變為東山一個大家族嘅「領導人」。《珠》係女角為主；《東》同樣係女人最大。今年台慶劇特色，就係女角玩晒。
佘詩曼同黃浩然本來愛得轟烈，可惜卻受到黃阿媽汪明荃從中阻撓，甚至出到棒打嚟拆散佢哋，終至分手。
馬德鐘本係潘家屋企司機，因一次意外救番少爺仔黃浩然，因而揭發原來自己先係潘家長子大少爺。
響大陸撈咗一段時間嘅蕭正楠，終於鳥倦知還，《東》係佢同無線簽約後第一部劇。劇入面佢飾演一個小流氓關浩長，亦係方寶琦（李詩韻）初戀情人。最後更成為馬德鐘嘅馬仔，跟馬搵食。
郭峰飾東山望族潘兆棠，可惜最後竟然死響世交、軍閥曾偉權手下。
馬德鐘為保護自己利益而惹起一場又一場腥風血雨嘅權力鬥爭；而汪明荃最後為救馬以致自己中槍而亡。
《東》係講民初時期，本來係大戶人家小姐嘅佘詩曼，因為家道中落，被逼同阿哥麥長青賣艇仔粥為生，佘本來同東山少爺黃浩然係一對，汪明荃飾演嘅潘夫人就反對，甚至出到棒打鴛鴦一招嚟拆散佢兩個。從此，佘就發誓一定要做女強人。之後佘識到潘家司機馬德鐘後成為一對，查實馬就係汪明荃當年遺棄嘅私生子。馬德鐘本來品性純良，後同汪相認成為潘家大少爺之後，就變到利慾薰心，甚至犧牲親情、友情、愛情都無所謂。
阿姐響劇入面飾演表面睇好風光嘅東山一個大家族領導人，其實係個悲慘角色。後生時係未婚媽媽，因屋企人怕醜事揚咗出嚟，夾硬要將佢個仔（即係馬德鐘）送咗俾人。直到後來遇番馬，先知馬原本就係自己當年拋棄嘅私生子。而馬卻將其當仇人看待，兩母子充滿「火花」。到最後，阿姐更因為救馬中槍而死。
老實講，《東山飄雨西關晴》若單係得馬德鐘同佘詩曼呢對組合孭飛，加埋戲份較重嘅班底就得黃浩然、郭峰同商天娥，對比起人強馬壯嘅《珠光寶氣》，真係叫做弱咗啲，惟有靠阿姐呢個「野蠻奶奶」領軍，好好睇睇啦！
播映日期：10月27日起逢周一至周五晚8:30pm 翡翠台及高清翡翠台
角色關係解構
