10月21日 風騷出巡
見慣大場面的黎姿，全日被記者追訪，依然心情靚爆，難為父母狼狽地左閃右避。
入行23年的黎姿（Gigi ），於本周一（10月20日）在台慶劇《珠光寶氣》的首播活動中，戲劇性宣布退出娛樂圈，黎姿解釋退出是要全力照顧父母及病榻中的細佬黎嬰，打理細佬皮膚中心生意，但據知黎姿息影仲有另一個原因，是要鋪路嫁入豪門做少奶奶。
03年尾，自本刊踢爆黎姿與報業鉅子後人馬廷強秘密遊倫敦後，兩人交往更加小心，皆因馬生一向低調。據知兩人計劃秘密拉埋天窗，黎姿見時機成熟，便宣布退出娛樂圈，
埋心水待嫁。
黎姿宣布息影後，成為傳媒追訪對象。21日黃昏，她離開細佬公司途經連卡佛時，除被一眾傳媒追訪，更有不少途人圍觀，場面一度混亂，櫃枱的化妝品遭推倒地上。
暗交5年
黎姿與馬廷強交往5年，情投意合，二人更曾於IFC 的國金軒見家長。
05年，黎姿透過朋友介紹認識富豪馬廷強後，未幾便認定對方是結婚對象，兩人暗中交往多年，年多前便萌收山結婚打算，不過，適逢細佬黎嬰車禍，令其入豪門之路一波三折。
為了部署退出，近年黎姿刻意收起性感冶艷的形象，平日都以素顏示人，不是到細佬皮膚中心打點，就是到麥理浩康復院探望細佬，更返教會、做義工，放棄昔日爭名逐利的生活。
10月21日 認愛女結婚
同日下午，黎父去復康院探兒子，口快快爆咗個女快將結婚，身旁阿姨即時制止並拉佢上樓。
去年尾，黎姿（左）出席好友蔡加敏婚禮，身為姊妹團的她，接得花球時開心到暈，更笑言希望08年出嫁。《蘋果日報》圖片
聞婚訊黑面
自20日宣布「榮休」宣言後，翌日（21日）早上11時許，她便以事業女強人打扮展開平凡人的生活，對記者提問一概不回應。她一早到金鐘律師樓處理事務後，便返回黎嬰皮膚中心辦公，直至黃昏6時45分，才離開公司探細佬。
離去時，記者問黎姿是否與馬廷強結婚，本來全日都好風騷的她，即時面色一沉，當聽唔到加快腳步，記者轉問後面的黎母，她則笑住否認︰「冇……冇！」
不過同日，在復康院的黎父，卻一時口快漏咗口風，女兒快要結婚。黎父當日早上11時許，與Gigi 阿姨陪同下探兒子，只見他心情靚爆，輕鬆地挽住兩大袋食物下車，記者問他知唔知愛女退出娛樂圈，他話︰「知，一早知啦！（咁Gigi 係咪結婚呀？）係呀！哈哈！」
9月29日 生日收花
10月1日生日的黎姿，生日前兩天（29日）如常到細佬銅鑼灣公司打理生意，當日收了一大紮名貴花束，未知是否馬生送呢？
放工後，本來素顏戴住黑框眼鏡的黎姿，發現記者後，保母車駛至東角中心，Gigi突然跳車，戴上黑超。更為自己成功撇記者報以回眸一笑（圖）。
黎父知衰封嘴
記者打蛇隨棍上，再問他女兒婚期時，黎父正想回應，卻遭站在他身旁的黎姿阿姨制止，並搶著說：「唉呀！冇件咁嘅事，佢（指黎父）耳仔唔好咋！好啦！對唔住，我哋要上去（指上病房）！」說罷即急急拉住黎父上樓。
事隔三小時，Gigi 阿姨獨個兒開車出外，約半小時後折返。記者再問她有關Gigi 結婚一事，她十分避忌道：「你唔好再問我啦！我唔會講㗎啦！你哋走啦！」幾小時後黎父離開時，一言不發，對記者提問亦不再理睬，與剛才談笑風生兩個樣。
03年12月黎姿被本刊拍到與馬廷強遊英國，其間二人警覺性極高。
今年9月28日，黎姿出席《珠光寶氣》活動後，對追訪的記者說：「我生活好悶㗎，跟我無咩影到。」之後便到四季酒店，並由保安護送下搭𨋢，以攔阻記者，行蹤神秘。
IFC 見家長
其實，黎姿對婚訊如此避忌，皆因富豪男友想低調。知情者話︰「Gigi 同姓馬嘅富豪男友感情好穩定㗎啦，加上佢細佬身體狀況好番好多，佢成日都話女人最緊要搵到個好歸宿。雖然佢一向好多人追，鄧崇光（夜總會之父）亦好錫佢同黎嬰，但講到可以全面照顧到佢嘅，就真係依家嗰個馬姓男友。聽佢話男友好錫佢，之前仲喺IFC 嘅國金軒見過家長添，睇嚟都好事近啦！」
10月20日 最後合照
距離做《東張西望》直播還有個半小時，（左起）陳豪、蔡少芬、黎姿已經同樂易玲（右）在無線化妝間吱吱噚影「最後合照」。
黎姿同蔡少芬咬完耳仔後，蔡少芬即催促記者：「快啲過嚟，你哋再唔訪問佢（黎姿），以後都冇機會！」開路俾黎姿宣布退出。
黎姿邊講邊喊成全場焦點，被大批記者圍住，後面嘅李司棋、陳豪同邵美琪頓時變成大茄，樣子尷尬。
勝利笑容
成為全場焦點後，黎姿紅著眼話：「最唔捨得你哋（記者）！」但後來又轉悲為喜，話自己好滿足好開心，情緒恍如過山車。
計劃移民澳洲
知情者續稱，「個男人好有米，喺澳洲好多物業，Gigi 都有諗過將來成家移民澳洲，唔使成日俾記者追住，但佢又唔捨得細佬間公司，因為每次佢同黎嬰講公司嘅狀況，佢都識得笑同點頭，所以佢唔想執咗細佬嘅心血，依家仲心大心細。其實結婚係開心事，但個男人唔鍾意高調，之前Gigi 爆響口話兩年內結婚，之後都受到唔少壓力，所以佢連拍拖都唔敢認。」
難怪今年3月，黎姿呢頭晒幸福，話同G 先生蜜運並憧憬結婚生仔，冇耐就急急改口話傳媒誤會她意思︰「我冇一個G 先生，依家仲揣摩緊咋！」
為免影響與「G 先生」的婚姻，她拍罷《珠》劇，便開始部署息影之路。其實宣布「榮休」宣言當日，下午在化妝間時，她已經拉埋樂易玲與蔡少芬吱吱噚，商量如何演出這一幕「榮休風雲」。
不過，當晚黎姿不停強調︰「我始終係一個小女人，有依家咁嘅成就已經好滿足、好稱心滿意啦！」又話︰「希望做番一個平凡人、普通人，如果搵到個好好嘅如意郎君，我一定會結婚，但呢個係之後嘅事。」
10月18日 姊妹夾擊
《珠》劇活動上，蔡少芬、黎姿、邵美琪幾乎全程十指緊扣，儼如三姊妹，相當入戲，不過「篤波」剪綵儀式時，黎姿講到明話驚，但好姊妹蔡少芬仍使勁在她面前狂篤爆啲波，嚇得她面容扭曲。
Gigi 當日條裙唔算低胸，但卻突然勁錫身，超級小心，經常揞住胸口，驚死走光！
向來毫不吝嗇天賦身材的黎姿，鮮有地「包胸」上陣，同場的蔡少芬和邵美琪卻大開中門露罅夾擊。
黎姿04年奪得視后，戮力谷湯碗胸，但咁搏嘅佢，已經成為歷史！《蘋果日報》圖片
緣份要嚟就嚟
退出後仍要照顧細佬及家人，記者問她怕唔怕經濟問題？她氣定神閒說︰「我覺得人生最重要嘅，係一家人齊齊整整，錢方面現階段我好滿足。」黎姿表示目前計劃多多，甚至想過讀文學及心理學。問到結婚係咪其中一個計劃？本來眼濕濕的她，笑得異常燦爛話︰「緣份呢樣嘢，要嚟就嚟……人生大事就隨緣！我將一切交晒俾主，主自會安排到我嘅道路出嚟！」
黎姿唔使擔心錢又活得開心，除了主保佑之外，最大籌碼當然是富豪男友在背後支持。其實，去年黎嬰出事後，有指馬廷強即致電黎姿問候，更拍心口話可以安排私人飛機及醫藥費，送黎嬰到美國，搵醫好劉海若（鳳凰衛視主播，在倫敦因火車失事腦部重創）的腦神經科醫生凌鋒醫治，雖然最後黎嬰的狀況唔使去外國醫，但馬生這份心意，黎姿照單全收。有這個強大的後盾，黎姿想結婚退休，真係話咁易。
黎姿曾講過揀老公「不論高矮肥瘦，也不計較樣貌，最重要心胸廣闊，知識廣博，但不會找圈中人！」馬廷強啱晒條件！
馬廷強身家過億
馬廷強今年51歲，是《東方日報》創辦人馬惜如兒子。77年馬惜如離開香港到台灣，主力在台發展房地產，成立「如寶建設」，之後業務交由一眾兒子打理。早年，馬廷強在《東方》一直身居要職，負責對外事務，因而與娛樂圈及文化界中人稔熟。
98年，馬廷強離開東方出外打天下，並與馬氏另一成員馬廷偉開設「寶蘭實業有限公司」。
據公司登記，馬廷強除了「寶蘭」外，在港還有五間公司，當中包括有投資、醫療公司。他跟內地官員關係一向良好，近年更擔任深圳市政協香港委員，經常要到深圳開會。雖然馬廷強在香港沒有任何物業資產的登記，不過據悉他在澳洲擁有多個物業，市值過億港元。
08年4月 廣州登台
連續三年做時裝Moiselle 代言人。《蘋果日報》圖片
黎姿千萬富婆
黎姿十四歲經許冠傑推薦，在電影《開心鬼放暑假》客串而入行，在娛樂圈打滾23年，電影、電視、唱片都撈過，04年憑《金枝慾孽》奪得無線視后，成為她演藝界事業高峰。
成為視后，剪綵、廣告、登台等接踵而來，她拍劇每集酬金二萬五，內地騷價約十五至廿萬，而商場騷價約十萬，廣告方面則由廿萬到五十萬不等，內地廣告更逾一百萬。
04年，她自爆：「呢段時間賺咗六位數字。」加上劇集一套接一套，《妙手仁心III 》、《火舞黃沙》、《通天幹探》等，均是無線重頭劇。05年單是廣告收入已有300萬，而06年的登台、廣告收入約460萬，成為無線最賺錢姐仔第8位。07年減產亦有七位數字收入。
黎姿一向投資有道，97、98年炒樓已賺約八百萬，而現居的大坑豪宅慧景園，市值約千二萬。估計其身家約四千萬，黎姿曾揚言希望在這幾年內賺夠八位數字收山，看來她的目標已達到。
1月時黎嬰剛轉院，可以食流質食物，並長回濃密頭髮。
今年5月，除了本來的物理治療，黎嬰已開始接受職業治療，即動作較生活化。《face 》圖片
預千萬醫細佬
黎嬰去年五月遇上嚴重車禍，腦部重創昏迷兩個月，昏迷期間病情反覆，在瑪麗醫院接受三次腦部的大手術後奇蹟蘇醒，但由於其脊椎在意外中受到嚴重撞擊，大大影響說話及四肢活動能力，要留醫接受七個月的深切治療。
去年十二月，黎嬰被轉介到麥理浩復康院，入住私家病房，並安排看護廿四小時照顧，每日接受五小時密集式的物理治療。黎嬰每月住院、治療費、看護費用共八萬多元，加上之前在瑪麗醫院接受十次大小手術費，並在歐洲訂購十萬元的鈦金屬頭蓋骨，醫藥費已花掉約二百萬。
黎姿在宣布息影當日，透露細佬病情：「緩慢康復中，康復時間係以幾年作計算。」可見黎嬰要康復，幾年間仍要繼續燒銀紙，醫療費千萬冇走雞。
純情妹變拜金婦
80集台慶劇《珠光寶氣》，首日收視已經有32點（208萬觀眾），最高更去到37點，比《溏心風暴》首日的30點收視更勁。三個花旦邵美琪、黎姿及蔡少芬大鬥演技。第一個禮拜，暫時以蔡少芬的巴辣三妹最搶戲，不過，劇情往後講黎姿由愛情大晒的少女轉變成爭名逐利的有錢太太，角色心路歷程好大發揮。
黎姿險被強姦
黎姿飾演雅瞳，為三姊妹中最純的一個，戀愛大過天。她與老公（鄭健康）離婚後，被二世祖哲男（陳豪）熱烈追求，但她卻情傾報攤老闆啟發（關禮傑），兩人情投意合拍拖。一向重感情的雅瞳，為三妹雅思（蔡少芬）及妹夫志球（蔣志光）向哲男求情，險被強姦，最終更與他譜出「政治婚姻」。
蔡少芬背人垂淚
蔡少芬飾演雅思，是現實派代表，先嫁給上市公司主席志球（蔣志光），過闊太生活，最後離婚收場。積極進取的她，再搭上富豪賀峰（岳華），亦即陳豪的父親，但風光背後，她回望自己為名利犧牲愛情及親情，最後搞到眾叛親離，不禁淚如泉湧。
邵美琪周旋兩男
大家姐邵美琪飾演雅言，為工作放棄身邊一切，令老公（鄧梓峰）亦頂唔順走埋。後遇上有錢仔長勝（林保怡），首次見面便被對方推落水。下周講長勝招攬雅言入其公司，兩人由冤家變情侶。之後雅言與長勝好友日東（黃德斌）結緣，最終變成三角關係。
