見過鬼原來唔只怕黑，仲怕出聲，因為要講英文呀嘛。Janice Man （文詠珊）自從上次出席國際model 活動用英文講咗個單音「ya 」就口啞啞講番中文後，上星期三（15日）晚又面對新挑戰喇。
當日佢出席荷蘭家電品牌Princess 嘅活動，現場梗係多品牌嘅外籍高層啦。所以上到台，女神都當自己時運高避得就避，人哋同佢握手佢就話「thank you 」，遞杯果汁畀佢就應：「Mango juice ？I know.......I know 。」係囉，講少嘅，咪錯少嘅囉。既然you know ，咁人哋老外都冇再留難佢喇。老外放過佢，FBI 就唔放過呢個機會問佢識唔識當晚有份表演嗰位爵士天后Laura Fygi ，Janice 笑住話：「我知佢來頭好勁，其他嘢我唔同你講喇，費事你又寫我乜乜乜。」深明講多錯多大義，Janice Man 真係學精咗喇。
Janice Man 喺住D&G 裙盛裝出席中環置地文華酒店活動，行政總廚Richard （左）主動上前問佢嘢，仲問佢覺得泰國點，知唔知呢杯係咩果汁，Janice Man 只答對方呢杯係芒果汁，仲用個廣告牌企圖擋住自己個嘴免上鏡出醜。
左：What do you think about Thailand?Let's try this.....（你覺得泰國係點？試吓呢杯嘢啦……）真實對白
右：Mango juice?I know......（芒果汁嘛，我知……）真實對白
Thank you!Thank you!
多謝搞掂當大會總裁兼CEO Aad Oubory 上前閒談幾句，Janice Man 交足戲拍手兼露齒笑，猛講：「Thank you,thank you.」係囉，講多謝永遠唔會錯㗎，醒目！
敷衍天后到呢晚大會邀請爵士天后Laura Fygi （右）出場，夾住喺兩個西人中間嘅Janice Man 避無可避，Laura 撩佢講幾句嘢，Janice 就係咁意答兩句，可能都係答thank you ！
一句到尾當FBI 想問佢同幾位外籍嘉賓傾嘅乜嘢，Janice Man 舉起手指公趕住走話：「我知Laura 係重量級人馬嚟㗎！」鬼唔知咩？
小方掂檔話晒HKU 畢業嘅方力申就主動好多，周圍撩西人傾偈，英文好過Janice 多多聲。
河國榮《蘋果日報》圖片
由TVB 藝人轉型做英文老師，連走咗去荷里活搵食嘅周潤發都係佢學生嘅河國榮就話，雖然Janice 想少講少錯，但就一樣唔妥：「因為佢（Janice Man ）句說話文法唔夠詳盡，外國人會覺得佢冇禮貌同好粗魯，佢應該答：『Alright ,Let's try together （好呀，我們一齊試飲啦！）』會好嘅。」
