陳柏熹（Harris）早前於法國收購的服飾品牌GERMAIN，昨日於沙田舉行新店開幕酒會，除得父母及妹妹撐場，吳千語、關心妍及何超盈等均畀面出席。曾跟文詠珊（Janice Man）傳緋聞的Harris，被問到JM近日搭上有米新歡鄭子邦一事，Harris即代為澄清：「係誤會嚟嘅，我事後都有問過佢，佢哋只係朋友。」問到JM醉攬鄭子邦，更捽對方面？Harris竟爆大鑊說：「其實佢每次飲咗酒後就會變得豪放！呀，唔係，我更正，佢係酒後減低咗戒心，只係當時咁啱係個男仔坐佢隔籬，如果係女仔佢反應都會係一樣。」
陳柏熹代JM否認新戀情，卻爆大鑊笑指JM酒後豪放。
何超盈畀面出席好友陳柏熹的服飾店開幕，卻姍姍來遲。
待與JM發展
Harris指自己亦曾跟對方飲酒，問到JM酒後可有捽他臉頰或其他部位？他笑說：「唔知點答你，有捽過臉啦，不過唔係好瞹眛咁捽。」Harris堅定的表示JM現時單身，記者笑指他豈不是有機會？Harris即謂：「我向來都有！只係我唔攞啫！」
吳千語將會拍咀嘴的親熱戲份。
以露臍裝騷22吋纖腰現身的吳千語，透露將在新片《王家欣》中有親熱戲碼，問到該戲碼激烈程度可令男友林峰呷醋？千語說：「咁激唔過佢嗰啲，只係錫下嘴啫！」她又指近日男友忙拍劇而令身材走樣：「其實我都唔知佢點，因為好耐冇見。」此外，千語男友林峰前晚在澳門威尼斯人金光綜藝館舉行的巡迴演唱會完滿結束，encore前，現場播放一段林峰工作夥伴的心聲，內容是關於林峰兩個人生大問題，就是退休和結婚，結果只有一位贊成林峰結婚，全體反對他退休。短片播完，林峰即刻解畫：「我冇講過話退休，我仲要開個唱。」他否認閃婚及結婚計劃，但強調與吳千語是認真，結婚對他們來說是人生必經階段。
from:
http://hk.apple.nextmedia ... 140526/18732428
