本月二十日出街嘅無線八十集台慶月重頭劇《珠光寶氣》，星期日（九月廿八日）全體主要演員出席宣傳，為新劇造勢。
去年拍劇期間，女主角之一嘅黎姿因為不斷請假照顧車禍受傷嘅細佬黎嬰，有傳令劇組台前幕後大感不滿，但當日所見，黎姿同各人有傾有講，尤其係蔡少芬，兩個一坐低就拖住手仔密傾，上到台同觀眾見面，同樣傾到唔停口，後來連邵美琪同李司棋都加入口水戰團。
啱啱播完《家好月圓》，稍後又有《珠》劇迼勢，令「荷媽」李司棋冧庄做台慶頒獎禮最佳女主角呼聲甚高，但司棋姐只係希望新劇可以嗱到更高收視，仲話今次嘅角色同「荷媽」、「大契」好唔同，賣晒廣告叫大家分清楚，多多捧場。
我驚輸俾《家好》呀！（設計對白）
實好收嘅！信主啦！（設計對白）
各演員上台輪流講解劇中角色，著住低胸衫嘅蔡少芬，只顧同黎姿喺台上不斷細聲講大聲笑。
兩姊妹後來兵分兩路，捉埋李司棋同邵美琪一齊傾。
三個女人一個墟，四位一體，台下有金執都唔知。
鍾嘉欣一連三劇出爐，但佢話比較滿意自己喺《搜神傳》嘅演出，到底係佢入行以來第一次擔正做女主角，感受零舍唔同。
