坊間有不少羊奶奶粉及豆奶奶粉選擇，不過一般比普通奶粉貴一半。左邊的卡洛塔妮嬰兒羊奶粉900克要$250；而美素力全豆蛋白質代奶粉400克要$70。
毒奶殺入香港，截至本周二已有四名香港小朋友中招患腎石，嚇到幾百個家長急急帶仔女去驗身，逼爆醫院！牛奶製品風聲鶴唳，連老牌奶粉都出事點算？
唔使擔心，營養師話，飲用毋須加三聚氰胺來冒充牛奶蛋白的豆奶奶粉或羊奶奶粉，既安全兼同樣可以餵到BB 肥肥白白，健健康康！
營養師黃薇
營養師黃薇話，市面上一直都有幾款用豆奶製成的奶粉，如果真係擔心牛奶或普通奶粉唔安全，可以用豆奶奶粉
代替。
「呢啲奶粉原本專為有濕疹或者對牛奶敏感的小朋友而設，成分同牛奶奶粉一樣，只係將原本牛奶嘅成分轉咗做豆奶。牛奶奶粉里面的維他命、葉酸等營養，佢都有齊，可以完全替代牛奶奶粉，所以媽媽唔使擔心小朋友唔夠營養。」
豆漿
毒奶陰霾下，300位家長帶小朋友到瑪嘉烈醫院排隊驗腎。《蘋果日報》圖片
包裝豆奶≠豆奶奶粉牛奶有問題，豆奶成為大熱替代品，連Starbucks 都話暫時改用豆奶沖咖啡，而近日更有國內同胞決定在家自製豆奶（即豆漿）給孩子飲，以杜絕毒奶風險。不過黃薇話，家長千祈唔好將包裝豆奶當係豆奶奶粉！
「雖然豆奶奶粉主要材料係豆奶，但同時添加咗好多嬰兒所需的營養同微量元素，但係豆漿只得大豆蛋白，並無鈣質、鐵質、維他命D 同多種氨基酸。」包裝豆奶飲品的營養亦唔等於豆奶奶粉，BB 如果飲豆漿或包裝豆奶代替奶粉的話，有可能會營養不良。而且紙包豆奶飲品如維他奶，含糖量較高，容易令BB 過肥同埋蛀牙，所以最好在一歲後才可偶爾給小朋友當作普通飲品。
營養師黃凱詩
6歲以上可飲羊奶至於年紀大嘅小朋友，就唔一定要飲植物奶，飲羊奶都得！尚營坊健康顧問、高級營養師黃凱詩話，羊奶可以代替牛奶，不過就要6歲以上小朋友先飲得：「牛奶和羊奶的營養成分差不多，如果媽媽想小朋友飲動物奶的話，可選擇坊間一啲專為小朋友而設的羊奶奶粉。不過我就唔建議6歲以下小朋友飲，因為羊奶中鉀同鈉的含量較多，嬰幼兒的腎臟有可能處理唔到，影響腎臟健康。」
