哼！唔理你！（設計對白）
唔好咁啦，Honey ！（設計對白）
鄧健泓（Patrick ）去年得到「Honey 」陳志雲欽點鹹魚翻生，主持、拍劇兼出碟，今年初更有機會在《銀樓金粉》坐正做男主角，一洗多年頹氣！
不過，一心想在唱歌方面大展所長的鄧健泓，竟罔顧陳總悉心安排，大膽推戲，更加大膽到周圍同人講，自己唔想做主持同拍劇；加上與女友李詩韻同居關係浮晒面，令一直對他照顧有加的陳總相當不滿。
唔聽話，鄧健泓打回原形，在兩部新劇中都只做大茄，危危乎！
鄧健泓與李詩韻月前被影到在西貢秘密同居，事後更高調承認戀情，結果激嬲陳志雲。
失勢被貶為大茄的鄧健泓，在新劇《桌球天王》開鏡拜神當日全程無晒心機，匿埋一邊。
推劇推Job
四年無出過唱片的鄧健泓，去年在無線總經理陳志雲穿針引線下，加盟正東唱片，簽約當日，唔止陳總撐場，司儀搵來重量級人馬嘟嘟姐鄭裕玲，連無線契仔李克勤都要出手俾面助興，威到震！
有陳總撐腰，鄧健泓要風得風，但為了專心錄音，他竟然連男主角都唔願做，今年初辭演民初劇《銀樓金粉》，要監製臨時臨急搵胡諾言頂替。
鄧健泓得寵時要乜有乜，出唱片之餘，更搶埋陳志雲另一愛將崔建邦《勁歌金曲》主持席位。
有恃無恐
鄧健泓有主角唔做，連做《勁歌金曲》主持都嫌棄，周圍同人講話自己只想唱歌，無時間兼顧其他嘢。再者，他與女友李詩韻的戀情亦經常見報，又被影到二人同居，眼見鄧健泓有恃無恐，陳總於是決定執行「家法」，將他打入冷宮，全力捧另一聽教聽話的愛將崔建邦。
「陳志雲要求手下愛將拍拖都要低調，但佢（鄧健泓）唔肯聽，仲俾傳媒影到同李詩韻一齊住，相反崔建邦就聽晒話，睇陳總對佢兩個今年生日嗰陣嘅態度有幾唔同，就知邊個得寵啦。」知情者說。
鄧健泓與崔建邦同是六月生日，前後只相隔兩日，不過陳總擺明大細超，唔止在崔建邦生日會上跳舞助興，更當眾承諾，會繼續俾更多機會壽星仔，至於失寵的鄧健泓，生日無人理，仲要開工拍劇。
鄧李二人三年前因拍《老婆大人》而撻喺，上月該劇拍續集，二人再演情侶，不過高調戀情卻令男方要入雪櫃。
崔建邦聽教聽話肯低調戀情，更不時夜訪志雲居所，得到陳總厚愛，崔生日時對方更high 到聞歌起舞。
新劇做大茄
已被打入冷宮的鄧健泓，一連在《老婆大人Ⅱ》及《桌球天王》中做大茄，兩劇男主角分別由陳錦鴻及秋官鄭少秋擔任。
打回原形，鄧健泓拍劇時經常無厘心機。日前《桌球天王》開鏡，在劇中做大茄的鄧健泓全程愁眉苦面，匿埋一邊做孤獨精。「佢講明唔鍾意拍劇，咁咪俾嘅閒角佢做囉，但佢又唔開心，開親工都無晒心機，成日苦埋口面唔出聲。」劇組人員說。
鄧健泓回應時承認新劇戲份不多，他說：「《老婆大人Ⅱ》只係客串，戲份少我無唔開心，上次辭演係電視台與唱片公司決定，總之都係專心工作。」
一句講晒，針無兩頭利！
