榴槤，果王。果王之王嘅「金枕頭」，口感酥軟香濃，一見到就想食，但亦有唔少人避之則吉，怕佢陣貓屎味。米施洛營養護康中心營養師陳潔玲話，泰國仲有句民諺：「榴槤出，沙籠脫。」即係話啲女人寧願脫掉身上條裙去賣，都要食榴槤，你話榴槤幾咁吸引。不過，榴槤高卡、高糖、又高鉀，減肥、糖尿同腎病病人宜少食。
糖尿及腎病者戒食
鍾情榴槤嘅陳潔玲話，榴槤唔止好味，仲好有營養添，包括蛋白質，脂肪同纖維素。每100克（大約半碗）嘅榴槤，有成133千卡卡路里、3.3克脂肪、2.3克蛋白質同2.1克纖維素。纖維素可以幫助腸道蠕動，腸都郁得好啲，但係榴槤嘅卡路里多過橙三倍，差不多等於一包細盒檸檬茶咁多，所以唔建議減緊肥嘅人食咁多，以免打亂咗佢哋嘅減磅計劃。
榴槤糖份其實好高，半碗榴槤有27克糖，差唔多等於三分之二碗白飯，或者7.5茶匙糖，糖尿病者唔應該食。陳潔玲仲提提大家，榴槤有好豐富鉀質，每100克榴槤有成510毫克鉀質，多過一條香蕉所含嘅鉀，如果有腎病嘅人，就要少吃為宜啦。
雖然榴槤美味且營養價值高，但一次過都唔應該食得太多，怕腸胃唔能夠完全吸收，就會好易上火，令到身體燥熱；萬一食多咗，可以食番清涼解熱嘅果后山竹解燥解熱。下次大家買榴槤嘅時候，不妨都買啲山竹，好好品嚐吓果王嘅酥軟甜蜜，同果后嘅甘甜清香。
如果您喜歡這篇文章，請按「讚」或分享給您的朋友，以示鼓勵。
