首日（6月17日）行Singapore Expo ，眼見四周圍已經俾LG 及Samsung 兩大品牌「插旗」兼霸地盤，場面夠晒熱鬧！而噚日介紹嘅Samsung ，更率先搞咗個OMNIA 新機發佈，加上Nokia 、Sony Ericsson 雙雙缺席，唔通今屆CommunicAsia （亞洲電訊展）真係咁冇睇頭？話又唔係咁講，事關LG 已於Day 1舉行Secret （KF750）記者會，呢部搭上觸控加體感嘅手機，玩過先知勁似老任Wii ，揮「棒」真實感強，小心跣手喎！
記者：陳國輝
攝影：譚盈傑
■現場真機雖然多達6-8部，但依然唔夠應付。
■會場內採用黑白雙色，跟足「Black Label 」個名。
做手部運動減肥
手機內置體感功能並非首次，但一直局限於搖骰仔等簡單動作，想逼真啲不如玩番Wii ！今次Secret 似乎想越級挑戰，機內特設一項「M-Toy 」功能，內有6項體感遊戲，包括棒球、鉛球、釣魚及飛鏢等，畫面與一般Java Game 無異，但玩家須以真實動作去完成任務。例如你選擇打棒球，電腦就會向你發球，只要對準Timing 再當手機係棒咁揮出去，打中即刻得分！減肥最岩。
■打棒球最難係夾岩個時間。
■釣魚難度似乎更高！
■揀Game 時以全圖象顯示。
■ 㩒一下熱感掣，便出現如水滴嘅圖案。
專用熱感多媒體
除咗玩Motion ，Secret 亦遺傳番Black Label Series 由第一代至今嘅熱感操作。舊作如Chocolate KE800利用四方向鍵以及兩邊選擇掣作熱感操控，至於Secret 更大膽，內置全新「Touch Media 」功能，選擇後竟將2.4吋屏幕也變為熱感一部份！值得一提係操作範圍不再局限於方向鍵，呢次還加入聽歌、調節音量、睇相以及瀏覽文件等，玩得更多元化。
■「Touch Media 」共提供五類熱感功能。
■聽音樂過陣，熱感屏幕大派用場，任你操作。
碳纖維更靚仔
今次用料夠特別，既唔係金屬殼、亦唔係膠殼，LG 方面話，Secret 前後兩面分別採用咗強化玻璃LCD 同埋3D 碳纖維兩種物料，與傳統手機比較，優點係更硬淨、更靚！先講屏幕方面，佢採用強化玻璃，除咗令畫面冇咁易花，亦可有效減低跣手跌落地時造成嘅損壞；而機背3D 設計，溶入黑白格仔圖案，襯埋跟機抹塵筆統一Pattern ，當然較普通膠殼更美觀啦！
■配用強化玻璃靚料精裝，影自拍都放心啲！
■機背3D 圖案充滿層次感。
■唔用熱感掣過陣，中間得一粒銀色Menu 鍵，簡約又有美感。
■配500萬像素相機，拎上手影相時感覺與Viewty 一樣咁輕巧。
■機側暴露晒DC 快捷鍵以及相簿掣，仲唔認係Viewty 第二代？
■拆殼拆電後可更換microSD 記憶卡，極限達到4GB ，應該夠晒用。
■預咗你印上手指紋，跟機送一支格仔抹塵筆，當裝飾都得！
Parts 逐一睇
Profile
制式：WCDMA 及GSM 三頻
體積：102.8×50.8×11.8mm
重量：116g
通話時間：229分鐘
備用時間：260小時
主要功能：500萬像素相機、自動對焦、臉部追焦、120fps 高速錄影、支援DivX 格式影片、Touch Media 、內置100MB 及支援microSD 卡
售價：待定
推出日期：6月內
同場加映
音樂鬚刨王
全身塗上咗銀色鏡面設計，唔講仲以為諾記鬚刨王再翻生！睇真啲，佢係LG KM380T ，雖懷疑利用鬚刨王做替身，但主打功能音樂，最特別係機殼上配備快捷聽歌鍵，選曲調校大細聲唔使揭開塊蓋，都咪話唔似SE W350i 呀！
規格：GSM 三頻、130萬像素相機、支援高達32GB 卡、EDGE 、A2DP
機頂加天線
睇見有條可伸縮嘅天線，但佢唔係高清LCD TV 喎！呢款HB620T 最強可支援DVB-T 數碼電視廣播，可惜香港唔岩用。還好佢仲能透過7.2Mbps 高速數據傳輸，欣賞直播串流節目，加上有Mobile XD Engine 技術，畫面仲幾銳利㗎！
規格：WCDM 及GSM 三頻、200萬像素相機、藍芽V1.2技術、HSDPA
與名廠結緣
Viewty之所以成功，除本身具備高速慢鏡攝錄以及吸引外形之外，最難得係獲德國DC 名廠Schneider-Kreuznach 認證。LG 食過翻尋味，呢次KC550同樣獲名廠承認，更加入每秒30格及高達720×480嘅高畫質攝錄，最好放上電視睇。
規格：GSM 三頻、500萬像素相機、防手感拍攝、ISO 800、TV-out 電視輸出
入門少女機
早前KG510推出火紅色機身，感覺熱辣辣之餘仲好岩女性用；今次LG 再公佈年輕化嘅KF300，內外均塗上粉紅色，少女味更濃，功能亦以簡約操作為主，例如屏幕下提供日曆、時鐘、聯絡人以及可自選功能嘅快捷鍵。
規格：GSM 三頻、200萬像素相機、支援microSD 記憶卡、A2DP 、FM 收音機
■戴埋頂帽，外形充滿日本鐵道車長Feel ！
■頸上掛條紅白色絲巾，想扮空姐定銀行職員？
■著到露臍短裙，呢一身空軍Look 簡直引死人！
