每年8、9月，都係唔少國家嘅選美季節，新一屆港姐已經積極培訓備戰，今屆雖然養眼佳麗唔算多，但相對其他國家，原來已經屬超班。
「新加坡小姐選美賽」日前16強入圍佳麗照片曝光，不過照片一出，就俾網民狠批質素低落，慘不忍睹。有網民留言：「醜到無法直視」、「新加坡美女原來全部是阿姨。」
對於網民嘅批評，主辦方表示，美貌唔係代表一切，心地善良先係最緊要，會評估佳麗對社會嘅貢獻。為咗平息「民怨」，主辦方事後喺facebook留言「世上沒有醜女人，只有懶女人」，話會重新包裝同訓練呢班入圍佳麗。至於有部份佳麗就指網民留言令佢哋「受傷了」。
而喺唔少合照中都戴著眼鏡、被批評嘅一位佳麗，則聲稱因為自己是研究生，眼睛敏感、近視嚴重，所以必須帶著眼鏡上陣。其實呢位「眼鏡佳麗」喺才藝表演環節時，亦遭到唔少人批評，話佢將急救作為才藝嘅一種，之後仲入埋16強！
from:
http://hk.apple.nextmedia ... 170718/20093506
