蒙嘉慧自從黐咗鄭伊健，曝光率直線攀升，「伊麵嫂」銜頭帶挈她不少演出機會，因此人亦變得囂咗。最近蒙嘉慧與郭晉安和曹永廉拍攝新劇《真心英雄》，就傳出她擺款扮阿姐。
本刊亦收到劇組人員投訴，蒙嘉慧經常詐病，更當眾勁寸同劇對手郭晉安，四圍辣火頭，神憎鬼厭。
自從三月開拍《真心英雄》以來，身為女主角的蒙嘉慧，已多次向劇組請病假，其中上月28日，蒙嘉慧原定與郭晉安、曹永廉早上七點在旺角街頭拍攝追逐戲，她卻七點半才通知劇組因病「冧廠」，一早到場的郭、曹二人，惟有谷住肚氣返屋企。
據知兩日後（30日）她又重施故技，突然向劇組請病假，不過同日竟被人發現佢陪住剛由天津做完《霍元甲》回港的鄭伊健。之前伊健留泰國個多月拍《風雲》，難怪有人不惜訛稱有病，都要把握機會會情郎。
失場報復
頻擺阿姐款的蒙嘉慧亦試過因不滿工作時間安排，講到明會為此失場。「知佢麻煩，已經盡量度靚個期俾佢。好似有日開五場，就因為第三場冇佢嘅戲，佢即刻發脾氣話：『有冇搞錯，要等成個幾鐘，你哋點編㗎，擺到明要我病冧廠啫！』第二日蒙嘉慧真係話病唔拍。唉！套戲原本話五月中拍晒，俾佢搞一搞，六月都唔知拍掂未！」一工作人員無奈說。
蒙嘉慧被批評腌尖兼演技麻麻，卻夠膽死當眾窒視帝郭晉安。工作人員續說：「有次佢同姚嘉妮、郭晉安做對手戲，姚、郭先後都NG 咗一次啫，坐對面嘅蒙嘉慧即刻俾面色人哋睇，仲窒人寸爆講反話：『結咗婚啲人零舍醒目！』安仔當時面有難色，冇出聲反寸佢，但俾著你都唔老嚟啦。」
安仔講好話
就所有不利傳聞，記者問過蒙嘉慧，她未有對外解釋，只說：「我唔想去回應，你哋都有晒古仔㗎啦，你哋去問番安仔啦！」至於被窒「醒目」的郭晉安，則大方幫YoYo 講好說話，「我唔覺佢窒我……大家合作冇問題。（有傳佢成日詐病拖慢進度？）我知YoYo 之前係有病過，我哋有好多對手戲……幾順利，拍劇係咁，rundown 成日都變。」難得被人窒都維護對方，呢位視帝都算大方！
麵嫂三宗罪
蒙嘉慧自從掛住「伊麵嫂」銜頭，工作陸續來，不過每次拍劇總是負面新聞不斷。
恰
仔：07年，蒙嘉慧夥拍歐陽震華拍《爸爸閉翳》，有指她蝦童星王樹熹（Jacky仔），以指甲弄傷對方，最終要在記者會扮friend （圖），事件才平息。
遲大到：07年中，蒙與郭晉安拍《與敵同行》，被指掛住拍拖經常開工遲大到，加上態度囂張，令工作人員不滿，公司遂決定在《法證先鋒2》減少蒙的戲份。
態度囂：今年5月，蒙再夥安仔拍《真心英雄》，但她態度依然，直斥對手演技唔好，還教視帝安仔做戲，工作人員均睇唔過眼。
5月8日，蒙嘉慧與劇中男朋友曹永廉在慈雲山拍外景，兩人僅在對稿時交談，其他時間蒙都係獨家村。
當日天氣約28℃，正當工作人員埋頭苦幹set 機時，蒙嘉慧就
埋塊面且急除下外套，當時身旁曹永廉（右一）都見慣不怪。
之後蒙索性自己走埋一邊，取出私伙扇子撥涼。
郭晉安與蒙嘉慧雖然合作多次，但看來交情不深。5月4日，兩人拍《真》劇時，除埋位拍對手戲外，其餘時間零交流。
