Sammi 臨陣想劈炮 嘟嘟君如口水功挽留
有嘟嘟同君如兩位阿姐睇住，Sammi 成功做咗個good show 。
周日（13日）晚有睇「香港電影金像獎頒獎禮」嘅觀眾，都大讚首次做司儀嘅Sammi 生鬼出色，一啲都唔輸蝕俾嘟嘟同君如。不過，媽咪姐收到工作人員透露，原來Sammi 喺開騷前三日（10日），通知大會話「好擔心，驚表現唔好」，提出劈炮。當時大會都亂晒陣腳，因為Sammi 一聲「唔做」，好多嘢都要改過，尤其當嘟嘟同君如聽到呢個消息，更加大反應，事關啲司儀稿又要從頭背過。在公在私都好，兩個阿姐立即輪流急call Sammi ，鼓其如簧之舌，派晒定心丸話會「睇實佢」，講足成晚電話，終於氹掂Sammi 回心轉意。
所以媽咪姐幾時都話，做人最緊要有信心，咁先至有突破㗎
