鄭秀文（Sammi ）信主後，曾公開表示會死纏許志安（講耶穌）。言出必行，Sammi 近月來果然經常主動約會安仔，一直用盡方法黐Sammi 搏反彈的安仔正中下懷，乘機向舊愛展開攻勢，頻頻約食飯唱K 傾心事。
二人翻撻，在安仔身邊仆心仆命十五年，兩年前才升格成為女朋友，卅三歲的助手「細佬」（潘
章），變得阻頭阻勢，踏正○八年一月一日，更被安仔以「莫須有」罪名叮出局，冇得撈。
安仔冇良心，但黐實Sammi 有運行，兩女只能揀一個，有Sammi 冇「細佬」，點會唔識揀！
安仔當年奪「最受歡迎男歌星」後向鄭秀文發表「廚房宣言」，令人感動，難得女方俾機會，安仔當然起勢猛追。
舊情復熾
許志安跟鄭秀文這一對長期糾纏不清，自九一年開始拍拖，○四年正式宣布分手，多年來不斷傳出舊情復熾，其間二人身邊亦分別出現男女朋友，但都是曇花一現或「無米粥」居多。直至○五年，安仔被踢爆跟私人助手「細佬」拍拖，二人感情正式浮面，安仔還笑笑口說「細佬」管理他的財政，私底下更俾信用卡「細佬」用，默認二人親密關係。
去年十月，安仔老豆過身，「細佬」便戴孝以家人身份打點喪禮，就算知己好友Sammi 連續在設靈及大殮兩日出現，亦只坐在客席，當時更傳出「細佬」跟Sammi 在靈堂「紮馬」，將自己花牌放在當眼位置，Sammi 的花牌就調到靈堂外圍，凸顯正印地位。
「自從嗰次Sammi 寧願延遲飛去上海準備演唱會，都要出席安仔爸爸嘅喪禮，安仔就相信Sammi 好重視佢，加上信主後，Sammi 脾氣變晒，又成日主動約佢唱K ，安仔覺得同Sammi 相處都開心咗好多，咪愈行愈埋囉。」知情者透露。
叮走「細佬」
對Sammi 有番感覺，本來服侍安仔，連司機打雜都做埋的「細佬」，在安仔眼中即變成煩爆「管家婆」，「細佬」知道二人有復合跡象，更打翻醋埕日嘈夜嘈，令安仔覺得要儘快作出決定。
「（十二月）廿六號新城頒獎禮，『細佬』仲幫緊安仔，點知一月一號嘅《叱吒》就唔見人，而家有人問起，安仔一早同唱片公司嘅人夾定口供，話『細佬』病咗，唔想俾人知佢炒咗『細佬』。」
其實新城頒獎禮慶功當晚，有人見到細佬雙眼通紅十足似喊過，表現得冇晒心機，問她何以如此？當時心情跌到落谷底，無厘神氣的「細佬」說：「失眠！我好辛苦，晚晚都訓唔到！」追問她是否有心事，「細佬」只不停反覆說好辛苦訓唔到，不肯道出原因。
安仔為Sammi 冷落「細佬」，雖然令她十分冇癮，但依然啞忍，不過最令她心淡是安仔竟然同身邊朋友講，炒「細佬」的原因是一向手握安仔財政，能夠隨時幫他開支票的「細佬」賬目混亂。
認識「細佬」的同行都知道她對安仔死心塌地，連安仔身邊的朋友都睇唔過眼說：「佢要炒『細佬』咪炒囉，唔使搵藉口，係人都知道『細佬』對安仔從無計較錢，淨係鍾意佢，安仔咁講對『細佬』好唔公平。」
「細佬」被炒，出現兩個版本。本週二（一月十五日）安仔往尖沙咀Hair Culture 整頭髮，對於炒「細佬」一事，他拍拍記者膊頭說：「唔好諗得咁嚴重！『細佬』病咗，暫時休息緊，佢本身幫我搏咗咁多年，都係時候休息吓放吓假，況且我呢排冇乜嘢做，都係去吓登台！有咩病？人哋嘅病，我就唔講啦！」
當講到今次炒「細佬」全因為Sammi ，他即時維護女友：「黐線，唔關事嘅，我同Sammi 一向都係好朋友，同『細佬』都有keep contact ！」
其實安仔跟Sammi 復合，一早已經有伏線。○四年分手後，二人一度斷絕來往，直至女方拍《長恨歌》出事患抑鬱症，安仔開始以短訊不時噓寒問暖，關係逐漸修補，自此二人已經常秘密見面，十三年感情，話咁易又再死灰復燃。
去年五月，Sammi 復出演唱會，腳傷做完手術的安仔撐住枴杖都捧場，當他聽到Sammi 在演唱會中讀出給「Mi 」的信時，更忍不住流下男兒淚。此情此景，看在「細佬」眼裡當然不好過，事後她同安仔更為此嘈大交而辭職唔撈。
豈料，兩個月後，「細佬」心軟又被冧番，不過安仔對她仍呼之則來，揮之則去，即使一張合照，都唔肯同「細佬」影，慌死對方「有嘢」揸手，後患無窮。
匿埋自閉
人又無，工又無的「細佬」，連日來足不出戶玩自閉，電話唔聽唔覆機，連有傳是由安仔打本給她在中環歌賦街開設的餐廳「Sup 1」都唔理，每當有人向睇鋪的「細佬」家姐問起她行蹤，其姐都支吾以對。
「『細佬』又傷心又嬲，覺得自己好蠢，咁多年都唔知為乜，仲同好朋友講話會爆大鑊，不過佢咁愛安仔，可能都係得個講字。」知情者說。
對於「細佬」揚言爆大鑊，安仔再次在電話中回應說：「傻啦！冇啲咁嘅事，大家唔好咁敏感啦，佢病緊，俾啲時間佢休息吓啦。」至於對方關係有變是牽涉錢銀轇轕，他說：「黐線，根本冇啲咁嘅事！」
安仔瞄準Sammi ，「細佬」一鋪清袋，現實！
非比尋常
許志安與助手「細佬」的情誼可追溯於華星時代開始，二人相交十五年，「細佬」暗戀安仔早已是圈中公開的秘密，直至安仔跟鄭秀文拖拉十三年，○四年分手，近年二人才傳出
緋聞。
身為安仔助手，「細佬」公私兩忙，不論是交水費電費，抑或是當安仔司機，她都永無甩拖，安仔過檔，「細佬」亦一樣如形相隨。
○六年，安仔公開表示「細佬」已掌握他的財政大權，負責幫他投資股票，默認正印地位。去年安仔老豆許明坤過身，「細佬」以契女身份戴孝，代表安仔發言時，更稱許父為「爸爸」，可見關係非比尋常。
情人助手
衞蘭阿端
衞蘭入行後由女助手阿端照顧，對方連衞蘭起居飲食都照顧埋，TB 款的阿端因為入晒屋，關係過於密切，惹來斷背疑雲，唱片公司A Music 於是將她辭退。
古巨基Lorraine
古巨基助手兼緋聞女友Lorraine 九五年開始傳緋聞，不過兩人一直保持低調，平時約會一前一後，絕不會拖手。Lorraine 多年來對基仔千依百順，甘心做背後女人！
薛凱琪Carmen
薛凱琪Fiona 與唱片公司宣傳人員Carmen 感情要好，經常孖公仔般出雙入對，她更不避嫌指Carmen 是她最重視的五件「珍藏品」之一。
15/12:00pm
當年又男仔頭又肥的「細佬」為安仔減肥扮靚，被炒後自閉多日的她本週二下午終於離開寓所外出。
安仔否認「細佬」離職，聲言她只是病倒要休息。
「細佬」升格女朋友後，打扮愈來愈女性化，舊年11月跟安仔出席公眾場合時，儼如女朋友。
