早前連續兩日都成為各大報章頭條兼城中熱話嘅，並唔係爭產風波抑或桃色糾紛，而係一條個個都爭住食嘅藍鰭吞拿魚魚王「日本一」。「日本一」被港人一夜殲滅，之後壽司店老闆鄭威濤（Ricky ）另購一條大魚王嚟香港，港姐徐淑敏同王君馨為咗爭食，連儀態都唔顧；而李珊珊更出動食店經理護駕迫入店舖，目的都只係為一嘗魚王滋味。天價魚王嘅魅力，真係令到各位美貌與智慧並重嘅港姐都為之瘋狂！
按日本傳統，每年築地魚市場首個交易日都會拍賣一條最貴及最靚嘅魚王，並稱之為「日本一」，雖然43萬嘅「日本一」抵港即日已被搶食一空，但壽司店老闆鄭威濤（Ricky ）再響日本另購一條同「日本一」差不多大嘅吞拿魚來港，再實行魚王平價益街坊。
久未露面嘅李珊珊本周二（8/1）下午發住燒，一臉倦容出席化妝品牌記者會，之後衫都唔換就到尖沙咀亞士厘道「板長壽司」食魚王，呢件拖羅果然夠吸引力。
反攻日本
壽司店老闆鄭威濤（Ricky ）近日因投得「日本一」而連番見報，港人除咗知道佢係味千拉麵、板前壽司、板長壽司同串燒店雪村老闆之外，Ricky 更係第一位成功到日本本土開設壽司店嘅香港人，打破一般日本人到香港開壽司店嘅定律；而陶大宇所主演嘅無線賀歲劇集《和味濃情》，據說是參照Ricky 嘅奮鬥史改編。
全城哄動
曾與蔡瀾嘆世界食好住好嘅李珊珊雖然與「日本一」無緣，但係當第二條魚王於本周二到港嘅時候，珊珊終於有幸品嚐肥美大拖羅。事後記者上前追問珊珊食後感，珊珊不停大讚話：「啲拖羅真係入口即溶，好好味，可以同我響日本食過嘅有得比。不過響香港好難得有咁嘅機會，今次我都係靠朋友先留到四件咋。」咁矜貴，難怪一向甚少在旺區用膳的她也要到來光顧。
據悉，前幾天「日本一」來港令全城哄動，除了少數熟客如楊天命和鄭丹瑞等，好多名人想食都沒有機會。該壽司店的負責人阿偉指：「『日本一』抵港當日，我哋所有分店全部爆晒。銅鑼灣分店仲派咗成四百張籌，好多熟客想食都冇機會。所以老闆決定訂多一條嚟香港，叫定啲老友嚟食。」
1月8日早上，壽司店老闆鄭威濤舉行
魚儀式時，在場的嘉賓如徐淑敏、王君馨及周美欣等港姐已經顯得非常猴擒，眾人為一片肥美大拖羅爭食不特止，Suki 仲差啲走光。在場記者有幸食到一件，都讚不絕口，呢條魚王真係魅力沒法擋。
為魚王失儀
本周二中午，該壽司店老闆舉行切魚王的記招，並請咗幾位港姐到來撐場。本來儀態十足嘅港姐，一見魚王竟然儀態盡失。
徐淑敏露脾
著住條連身迷你裙嘅徐淑敏為咗同條魚王合照，不惜烏低身露脾失晒儀態。
搶住食
向來最有儀態嘅女士非港姐莫屬，不過當睇到Suki 呢個狼死爭食嘅食相，唔知佢個中坑男友會唔會另眼相看呢？
王君馨高潮眼
極品拖羅有幾好食？睇睇食得好滋味嘅王君馨以一臉高潮享受中嘅表情告知大家「盡在不言中」。
魚王有幾勁？
藍鰭吞拿魚屬於吞拿魚最罕有品種，魚身大致分為魚背至魚尾位置的赤身，而其魚腩近魚頭部份尤其矜貴，拖羅可分等級為普通拖羅、中拖羅及大拖羅，而大拖羅亦有分蛇腹及霜降部位。今次李珊珊所食嘅係最貴嘅大拖羅，每片百一蚊。
在店內，本來病到面無表情嘅珊珊見到面前嘅魚王刺身，即刻急不及待夾起一片大拖羅塞入口中，原本發緊燒嘅佢都面露笑容。
當晚其實已經有大批食客聞風而至，壽司店門外逼得水洩不通。如果李珊珊唔係一早約好，相信都冇機會食咯。
忽然一周第650期
