上個禮拜五（廿八日），無線新劇《盛世人傑》（暫名）試造型，當日焦點，除咗李香琴回巢無線即刻有劇拍，仲有「洗底」多時嘅郭羨妮，終於放生拍劇。
雖然有工開，但新劇角色居然做廖碧兒「後底
」，呢對「母女」實際年齡只差五年，郭羨妮口話唔介意，但當廖碧兒叫佢做「阿媽」，佢即時耍手擰頭話：「唔好咁叫我啦！」
做人阿媽都肯接，郭羨妮無非想靠呢個賢妻良母角色，改變觀眾觀感。成功與否暫時未知，但《盛》劇時代背景發生喺唐朝，所有女演員本應要性感肚兜示人，偏偏最好身材嘅廖碧兒，因為角色武功高強，包到上頸嘅打女look 成為主要戲服，實在太曬料。
琴姐回巢拍劇，據聞非常重戲，至於朱慧敏（左一）、葉翠翠同姚嘉妮（右一、二），飾演爭寵後宮佳麗，真正女主角，始終係琴姐。
女主角係琴姐，至於男主角，由鄭則士飾演狄仁傑，剛新婚嘅曹永廉做昏君，而港男黃長興戲中會強姦皇后葉翠翠，做奸角。
兩「母女」以唐朝開胸裝合照，郭羨妮一時間接受唔到有個咁大咁好身材嘅女，唔准廖碧兒叫佢做阿媽。
.
