湯盈盈05年憑《阿旺新傳》醜女「李笑好」彈起，今年終於有機會擔正做女主角，點知《兩妻時代》收視不濟，劣評如潮。事業停滯不前嘅湯盈盈，最近黐實出名多窿路的曾志偉，希望爭取多啲演出機會。本刊發現志偉連月來去台灣、馬來西亞同日本拍特輯以及登台，都總會預埋湯盈盈。早在10月台北之旅，湯盈盈更當街為志偉抹汗，親密關係不言而喻。
今年10月，湯盈盈為《味分高下》及新節目《獎門人取犀Game 》到台北拍攝特輯，當時本刊發現志偉跟湯盈盈關係特別密切。10月22日晚10時許，大隊為台灣中天電視節目《小氣大財神》錄影後，齊齊去附近的火鍋店晚飯。飯後，眾人返回下榻的新世界皇朝酒店，同行的洪天明、謝天華等人行先一步，志偉與湯盈盈墮後邊行邊傾，其間見湯盈盈殷勤地為志偉抹汗，之後兩人才雙雙上樓。
大馬搏到盡
湯盈盈得到志偉帶挈，去大馬雲頂登台時，亦知恩圖報搏到盡，以超性感造型演出。
日本黐住玩
節目《獎門人取犀Game 》於上周一（12月10日）去日本拍特輯，當日出發前在機場影大合照，湯盈盈同志偉都要黐到實。
獲特別照顧
本月初志偉拉大隊去大馬雲頂登台，湯盈盈亦榜上有名，還有報道指志偉在台上向她上下其手抽水。上周一（12月10日），志偉再拉大隊到日本為《獎門人取犀Game 》拍特輯，湯盈盈當然有份。據知情人士透露，「呢排志偉見盈盈個勢唔好，即刻叫電視台啲friend 有咩都預埋佢。盈盈早前生日都請埋志偉去Basement （夜店）慶祝，嗰晚佢哋好親密。」
本周三（12月19日）下午，湯盈盈出席明珠台活動時，直認得到志偉特別照顧，「其實獎門人十年前去泰國拍嘢都有預我，志偉係好錫我嘅。」
談到《兩妻時代》收視差，與被譽為福將的歐陽震華合作，但收視依然唔理想，上周平均收視只得28點，湯盈盈話：「可能觀眾呢排去shopping 冇時間睇啦！今次我太緊張，表現麻麻哋。」湯盈盈有志偉射住，拍劇唔掂轉做綜藝節目，都唔怕冇得撈啦！
做番二打六
新劇《疑情別戀》男女主角係苗僑偉同袁詠儀，湯盈盈打回原形做二打六，湯盈盈就解釋，「因為兩套劇個監製一樣，所以我先幫手客串啫！」
台北街頭抹汗
食完飯行返酒店途中，湯盈盈見志偉滿頭大汗，即體貼地響手袋嗱出紙巾。
湯盈盈細心為志偉抹汗嘅情景，當時盈盈個樣，真係好溫柔同賢淑。
志偉有靚女親自抹汗，當然非常受落，笑淫淫之餘仲露出一副冧樣。
