謝安琪產後復出了。
不過，30歲的謝安琪不是張栢芝，她沒有在中半山慢跑收身，反而比生前更大隻，可以令人誤以為又佗第二胎；她也沒有月花10萬谷到個仔變超嬰，反而被拍到奶奶走去賣汽水罐舊報紙，收得5元半報酬，從此，多了個窮媽的朵。
從見其聲不見其樣出道、到箍住牙宣傳處女碟，聲勢好到不得了時突然話懷孕3個月，再奉子成婚嫁畀一樣住在新界的張繼聰……
謝安琪不論婚前婚後生前生後，一樣破格：「行100¥店（在日本度蜜月）、住村屋有乜奇呀？邊個話一定要曲線玲瓏至係靚呢？
係呀，我身形未係最標準，但我活得快樂喎！」
快樂，因為隨意；隨意，所以破格；破格，所以與眾不同，所以可愛。所以，謝安琪的復出，比張栢芝更讓人期待。
我回來
06年11月27日，被譽為樂壇天后接班人的謝安琪，突然召開記者會，宣布懷有男友張繼聰骨肉。然後，2月完婚，6月產子，說好了將於07年尾回歸樂壇。謝安琪果然回來了。
「天后接班人？真係有人咁講咩？我冇諗過做天后，亦從來想像唔到自己會係響舞台上光芒四射嗰種。人哋愈係對我有期待，我反而冇諗住一定要嚇你一跳。無謂搞到自己咁大包袱，音樂唔係一樣複雜同扮高深嘅嘢，唔使一定要與別不同，真心又舒服，就可以。」
如期復出，本來是很有口齒，結果，跟謝安琪一起回來的，還有她的脂肪。大家都被她月初出席《勁歌金曲》的肥腫紅噹噹村姑裝嚇傻了，大家都以為，女人嘛，嫁了、生了孩子，就放棄了；對於外形和被所有人看好的前途，已經不再積極了。
「點樣為之唔積極啫？淨係我結完婚、生完BB ，就出番嚟工作出碟呢件事，已經夠晒積極啦！而家呢個社會，個個都話減肥，作為一個歌手，我要承受呢啲壓力仲大。每日有人同我講，我太肥，每次見記者，都話要問我回應，幾時同埋點樣收身。邊個話，一定要瘦到咁苛刻先至係靚呢？係呀，我嘅身形未係最標準，我未係最曲線玲瓏嗰個，但係我都活得好快樂，唔得咩？」
窮媽媽
以沒有包袱的音樂人自居，連肥瘦都唔拘，謝安琪倒是說得輕巧。
結果是，一舉手一投足，就成了新聞，比如話平平哋自遊行到東京逛100¥店，比如話貪平住3千5月租村屋、歎茶餐廳下午平價餐，就顯得不那麼有星味；更甚的，是在訪問她的這個星期，有雜誌拍了張繼聰母親，即謝安琪奶奶，拿報紙汽水罐去回收鋪換錢，謝安琪因此被冠上了「窮媽」的封號。
「真係咁啱，屋企燒完嘢食，自然多瓶瓶罐罐。一時諗起無謂浪費，奶奶咪嗱去回收鋪囉，事前仲要周圍問人屋企附近邊度有添……今次真係有啲嬲，因為連累咗奶奶、連累咗BB 。奶奶返嚟仲擔心過我，同我講：『會唔會唔係咁好呀……我都唔知嗱啲汽水罐去，佢哋會畀錢我㗎……』令到一個老人家承受不必要嘅壓力，最過分！」
其實，用不著週刊雜誌加多幾錢肉緊，拍多幾張食茶餐廳的圖片，我們也知道，出道剛滿兩年、沒有家底可言、齋做音樂人的張氏兩公婆，搵錢確實唔多。
「我自己enjoy 呢一個方式喎，行100¥店、住村屋……的確係我人生呢一個階段嘅生活方式，難保我有朝一日突然想豪番次呢？我唔怕被報道，本來真係唔介意，怕咩呢？我嘅生活又唔係話千瘡百孔！老實講，賣碟，收入一定唔會好豐富。好在，我哋兩公婆作為歌手，總搵到各種收入來源，俾人話窮咪窮囉，畀到家用同養小朋友咪夠囉！」
窮又點？謝安琪兩母子咪又係肥肥白白！
三人行
30歲人，謝安琪一直做自己想做的事，唱自己想唱的歌，甚至據聞是主動出擊，追求自己想追求的男人——張繼聰。所以，謝安琪總是快樂的，而最快樂的事，莫過於一對愛人變成了三口之家。
「以前，我覺得啱嘅嘢，一定會企硬堅持，諗到就去做，行直線，去得好快。而家，停低要諗嘅時間多咗。做咗媽媽以後，最大嘅分別，應該係自己以前係一個自由自在嘅個體，而家每個決定要兼顧我老公、囝囝呢個團體。」
囝囝3個月，張栢芝已經搵定升學資料，認定Lucas 謝振軒有經濟頭腦，有收購中華電力的大志。此媽不同彼媽，除了冇咁豪，謝安琪的育子之道，亦與栢芝大不同。
「本來覺得玩樂器都幾好，個人專注啲、有修養啲，壞極都有個譜……不過我父母從來唔會要求我做好多嘢回報、或者做啲令佢哋好有面嘅嘢，我嘅成長好舒服，因此我都想我個仔係咁，唔想對佢抱太大期望。唯一希望嘅，係我嘅仔係一個善良嘅人。我覺得一個人，只要善良，凡事包容睇得開，就好容易會開心。心地好，識得欣賞、識得感恩，人自然會快樂……所以我改佢個名叫張瞻。」
十五樓養嘅牛牛
6歲開始學鋼琴，謝安琪說，不懂音樂的父母，無意間發現她的音樂天分，才下決心開始培育：「幾歲人仔咋，我已經日日攬住個玩具琴，不經意執啲廣告歌出嚟彈吓，爹哋媽咪咪送我去學琴囉！」
廣告歌？比如十五樓養嘅牛牛？
「係喎……應該都有掛……有陣時都會諗，除咗緣分，真係唔知點解釋。」
有報道說，中學年代，謝安琪在大埔恩主教書院讀中學、做張繼聰師姐年代已經對師弟有好感，卻原來，緣分，可能在更早的時候已經發生。
香港大學文學院畢業的謝安琪（中）說，自己不算高材生，但從小不是個需要父母擔心的孩子。
初出道，雖然箍牙造型夠嚇人，但賣碟隻隻過萬，好過好多天后級人馬。
