眼見大契台慶嗱女主角獎，老一輩演員應該會覺得希望在人間，隨時搵到第二春。
家燕姐將開拍民初劇《銀樓金粉》，又係講爭產爭老公，本來好有機會繼「唏唷唏唷唏」之後再發圍。可惜，本來由大紅人鄧健泓做男主角嘅《銀》劇，因TVB 錫住愛將全力做唱片宣傳而臨時易角，主角變咗胡諾言。
上年8月拍《我外母唔係人》已經被梁榮忠搞到放響收費台播，今次諗住拍住貴人冇甩轆，點知都係冇運行。難怪薛家燕都好坦白講：「而家換咗角，大家都有失望，雖然拍劇合作唔到，不過佢話會作番首歌送畀我。」
不過最老實嗰個原來係鄧健泓：「近排要做唱片宣傳，劇集實有機會再拍嘅。」係囉，佢個太陽真係猛啲囉，好曬呀！
《銀》劇冇咗鄧健泓，家燕姐梗係擔心套劇又變倉底啦，不過最驚應該係楊思琦，解凍第一部戲就搞成咁，「上素」都冇用呀！
胡諾言都係一個月前收到通知拍《銀》劇：「真係唔知原本係鄧健泓拍喎！開心！我都未試過同楊思琦合作。」梗係啦，都未試過做男主角。
《蘋果日報》圖片
鄧健泓好老實咁話拍劇大把機會，一副唔志在咁款，難為胡仔開心到死呀，陰功！
《蘋果日報》圖片
