吳雨霏（Kary ）接力「金牌一姐」鄧麗欣，出年1月響Star Hall 開3場演唱會，勁歌熱舞一直是Kary 賣點，每日跑步練氣，地獄式排舞，真係攰到甩轆。不過近排有傳Kary 患上怪病，上個月初，她更在blog 內留言表示，患病時，停晒所有工作，多謝公司諒解。
原來Kary 所患的病非同小可，早在10月尾時，試過突然休克暈倒街頭，全身抽搐，好在及時送院救治。
成日病嘅Kary ，對於傳聞患怪病一事，緊張回應：「邊個話你知？」
經理人Paco 力撐Kary 龍精虎猛：「佢不知幾健康，之前因為坐飛機太攰先暈低，我放咗佢兩個禮拜假，發羊*？冇冇冇……佢而家訓身為個唱綵排練舞，病點會咁有精力先？」
10月尾有一晚，面色蒼白、兩眼無神、頭髮蓬鬆嘅Kary ，出現跑馬地養和醫院急症室，全程由媽媽攙扶著，看來非常疲倦。知情人士透露，Kary 當日下午於銅鑼灣暈倒街頭。
承認抽筋
據知事發前Kary 剛由美國登台回港，即與媽媽到銅鑼灣shopping ，二人行逛約1小時，Kary 突然眼前一黑、失去知覺，即時暈倒街頭。事出突然，Kary 媽亦不知所措，據一位目擊人士透露：「當時Kary 出現抽筋現象，可惜四周圍嘅人冇幫手，好彩後尾有個後生仔見Kary 抽筋，情急之下嗱出個銀包畀佢咬住，我個friend 發羊*都係咁症狀，可能驚佢咬到條
掛！」
10分鐘後，Kary 才稍為清醒啲，他續說：「個男仔買咗支水畀佢，仲問Kary 媽媽使唔使報警安排送院，Kary 媽媽即時say no ，話自己會送囡囡入院。」
否認發羊*
週日（2日）Kary 直認早前曾暈倒街頭，仲話當時媽媽最驚：「嗰日我突然暈咗，媽媽真係好驚，當時我冇晒知覺……我有抽筋不過唔係好嚴重，因為我去完美國登台，所以有jet lag （時差），十幾個鐘機，攰得滯所以暈咗囉，（有人話係「癲癇症」病發喎！）唔係，邊個話你知？我之後做全身檢查都一切正常，而家唔使再食藥同覆診，真係冇事，多謝關心啦！」
嘆生命短暫
唔好睇Kary 唱得又跳得，其實佢係藥煲，更自言：「我成日病㗎！」6月初，更因鼻敏感以致右耳聽覺失靈，要不停噴類固醇，搞到唱歌喘晒氣而唔開心，不過Kary 更珍惜生命，在blog 內留言：「……life is short ……extremely fortunate to have a healthy body 。」（意思：生命短暫，非常慶幸有健康的身體。）Kary 有病就要睇醫生喇，如果唔係演唱會點頂呀？
Blog 爆病情
鬼妹仔嘅Kary 成日病，佢響自己個blog 度自爆跳舞喘氣，又成日要食藥，真係孱過孱仔強！
癲癇怕閃光
家庭醫生關嘉美表示，抽筋休克原因有好多：「醫學書中冇寫疲倦暈低再出現抽筋的症狀，不過發羊*症狀之一都係會暈同抽筋。」
她解釋，「發羊*」學名癲癇症，由於腦部神經細胞發出唔正常電波，嚴重會全身抽搐，亦會咬傷舌頭：「可用一包紙巾代替銀包。嚴重病患者更會流口水同失禁，一般患者要長者服藥控制。癲癇病人要小心閃光，唔好做過劇烈運動，壓力亦會容易發病！」
10月份Kary 頭戴鴨嘴帽、口罩蒙面神秘入養和，當發現記者即以9秒9離開，當時記者問及入院原因，Kary 堅拒回應。《蘋果日報》圖片
對於當日抽筋暈倒街頭，Kary 表示要多謝救佢嘅猛男：「我真係好想多謝佢，得佢咁幫我先冇事。」
休養寫blog
出院後（11月1日）Kary 向fans 表示病情好轉及多謝支持佢嘅所有人。
